Ресей Өзбекстанда шағын АЭС салатын болды

Биыл 26-27 мамыр күндері Ресей президенті Владимир Путин Өзбекстанға екі күндік сапармен барып қайтты. Екі елдің басшылары 27 құжатқа қол қойды. Соның бірі – Ресейдің Өзбекстан жерінде АЭС салатыны жөніндегі құжат.

Бұл құжат Өзбекстанда резонанс тудырды. Өзбекстан халқы АЭС-ті салатын "Росатом" батыс елдерінің санкциясына ілігуі мүмкін екеніне, сондай-ақ технологиялық тұрғыдан артта қалғанына алаңдаулы. "Росатом" өзге елдерде қолға алған атом станцияларының құрылысын уақытында аяқтай алмай жатқаны тағы бар.

Дегенмен сарапшылар ірі АЭС орнына шағын АЭС салынатынына назар аудару керек дейді.

Құжатқа сәйкес, ресейлік жоба бойынша 330 мегаваттық бірінші шағын АЭС Өзбекстанның Жызақ (Джизак) облысында жазда салына бастайды.

Екі ел 2018 жылы ірі АЭС салуға уағдаласқан. Атом стансалары суды көп қажет етеді. Сондықтан қуаңшылық жайлаған Өзбекстан шағын АЭС-пен шектелуді жөн көрген.

"Ташкенттің бұл шешімі елдегі атом энергетикасын кезең-кезеңмен дамытуға деген құлшыныстан туындап отыр. Өйткені әлем тез өзгеруде. Ғылым алға қарыштап дамуда. Егер бүгінде қолданыстағы технологияларға негізделген ірі АЭС салып тастаса, ертең ол ескіріп қалуы мүмкін. Шағын блоктар технологияның өзгеруіне қарай бейімделуге мүмкіндік пен икемділік береді. Бұл ретте шағын АЭС-тер жобасын жүзеге асыру Ресей үшін сондай технологияларды шетелге экспорттаудың тұңғыш тәжірибесіне айналады. Бұл технологиялар бүкіл әлемде перспективалы саналады", – деді ресейлік сарапшы inbuisness.kz-ке.

ӨР Атом энергиясы агенттігінің түсіндіруінше, биылғы жазда құрылысы басталатын шағын АЭС-тің бірінші реакторын Ресей тек 5 жылдан кейін ғана іске қосуды жоспарлап отыр. Яғни, шағын станцияның өзін Росатом тез сала алмайды.

Агенттік бұл жобаның құны Ресей жағының сұрауымен құпия ақпарат деп танылғанын және қоғамға жариялауға жатпайтынын жеткізді.