2027 жылдан бастап Қазақстанға кіру тәртібі өзгереді

Қазақстанда шетелдіктердің елге кіру және ел аумағында болу тәртібі өзгерді. Үкімет 10 қазанда тиісті қағидаларды жаңа редакцияда бекітті. Соған сәйкес, Қазақстанға визасыз келетін шетел азаматтары электронды кіру рұқсатын рәсімдеуі керек. Жаңа талап кезең-кезеңімен енгізіліп, 2027 жылғы 1 шілдеден бастап міндетті болады.

Электронды рұқсатты Ішкі істер органдары Ұлттық қауіпсіздік органдарымен келісіп береді. Оны рәсімдеу тегін. Өтініш шетелдіктерге арналған цифрлық платформа арқылы Қазақстанға келетін күннен кемінде 72 сағат бұрын берілуі керек. Өтініш берген кезде азамат жеке басын сәйкестендіру немесе растау рәсімінен өтеді. 

Рұқсат 180 күнге беріледі. Алайда оның болуы шетелдік азаматтың Қазақстанға міндетті түрде кіргізілетінін білдірмейді. Шекарадан өткізу туралы түпкілікті шешімді шекаралық бақылау кезінде уәкілетті мемлекеттік орган қабылдайды.

Жаңа жүйе бірден толық іске қосылмайды. 2026 жылғы 1 қарашадан бастап ол Ақтау халықаралық әуежайында, сондай-ақ «Үрлітөбе», «Аухатты», «Атамекен» және «Нұрлы жол» автомобиль өткізу бекеттерінде енгізіледі. Бұл кезеңде электронды рұқсаты жоқ шетелдікке елге кіруден бас тартылмайды, оған жаңа талап түсіндіріледі.

2027 жылғы 1 қаңтардан электронды рұқсат тәртібі Астана мен Алматы халықаралық әуежайларында, ал 1 наурыздан Қазақстан шекарасындағы қалған өткізу бекеттерінде қолданыла бастайды. Бұл кезеңдерде де рұқсаттың болмауы елге кіргізбеуге негіз болмайды.

Ал 2027 жылғы 1 шілдеден бастап электронды рұқсат міндетті талапқа айналады. Осы күннен кейін рұқсаты жоқ шетелдік азаматты Қазақстанға кіргізбеуге негіз болады.

Электронды рұқсат, яғни ETA Қазақстанға визасыз кіретін мемлекеттердің азаматтарына арналған. QazETA платформасы қазір сынақ тәртібінде жұмыс істеп тұр. Бұған дейін электронды рұқсат алу визасыз елдердің азаматтарына ұсыныс сипатында болған.