Футбол тарихындағы ең ірі инвестиция: Қазақстан ФИФА-дан қанша миллиард тенге алады?

Халықаралық футбол федерациясы (FIFA) 2027–2030 жылдарға арналған футболды дамыту қорының бюджетін рекордтық 6,35 миллиард АҚШ долларына дейін ұлғайту жөнінде бастама көтерді. Бұл көрсеткіш ұйымның бастапқыда бекіткен жоспарланған межесінен екі еседен астам жоғары.

Ұсынылған бағдарламаға сәйкес, бөлiнетiн қаражат келесі бағыттар бойынша игеріледі:

• Ұлттық федерациялар: ФИФА-ға мүше 211 ұйымның (соның ішінде Қазақстан Футбол Федерациясының) әрқайсысы төрт жылдық кезеңде 25 миллион долларға дейін қаржы алу мүмкіндігіне ие болады (бұған дейін бұл сома 10 миллион долларды құраған болатын).

• Континенталдық конфедерациялар: Алты құрлықтық конфедерацияның әрқайсысына 99 миллион доллардан бөлу қарастырылған.

Жаңа бағдарлама аясында басымдық женескей және жасөспірімдер футболын дамытуға, сондай-ақ қаржылық ресурстары шектеулі елдердің спорттық инфрақұрылымын жаңғыртуға беріледі.

ФИФА-ның қаржылық мүмкіндіктерінің кеңеюі АҚШ, Канада және Мексикада өтетін, тарихта алғаш рет 48 ұлттық құрама қатысатын 2026 жылғы Әлем чемпионатының жоғары коммерциялық көрсеткіштерімен түсіндіріледі.

Ұйым болжамы бойынша, 2022–2026 жылдар аралығындағы циклдің жалпы түсімі шамамен 15 миллиард долларды құрайды. Осы табыстың арқасында ФИФА өзінің резервтік қорынан тікелей 3,5 миллиард доллардан астам қаражат бөлуге мүмкіндік алды.

ФИФА президенті Джанни Инфантино мүше-ассоциацияларға жолдаған ресми хатында:

«ФИФА-ның қаржылық табысы футболдың және оған мүше барлық 211 ассоциацияның игілігіне қызмет етуі тиіс. Біз бірлесе отырып, барлық ұлттық қауымдастықтар мен әлемдік футбол үшін тұрақты әрі сенімді нәтижеге қол жеткізеетінімізге сенімдімін», - деп атап өтті.

Аталған бастама қазіргі уақытта континенталдық конфедерациялардың қарауына жіберілді. Бағдарламаның соңғы нұсқасын ФИФА Кеңесі 2026 жылдың желтоқсанында дайындайды, ал ресми бекіту шарасы 2027 жылдың мартында өтетін ұйымның 77-ші Конгресінде жоспарланған.