Отбасы банк қазақстандықтарға алты ай күтпей-ақ пәтер сатып алуға мүмкіндік берді

15 қазаннан бастап Отбасы банк арқылы кейбір жаңа тұрғын үй кешендерінен пәтер сатып алу тәртібі жеңілдеді. Енді салымшы депозитінде үй құнының 50 пайызын жинаса, бағалау көрсеткішінің қажетті деңгейге жетуін күтпей-ақ аралық заем рәсімдей алады, деп хабарлады банк.

Бұған дейін аралық тұрғын үй заемын алу үшін салымшы депозитінде қажетті соманың 50 пайызын жинап қана қоймай, бағалау көрсеткішін кемінде 5-ке жеткізуі керек еді. Оған жету үшін салым ақшаның көлемі мен жинақ мерзімі ескерілетін. Банк мәліметінше, іс жүзінде бұл шамамен алты ай күтуге тура келетінін білдірген.

Енді жаңа тетік бойынша депозитте заем сомасының 50 пайызы болса, бағалау көрсеткішінің 5-ке жетуін күтудің қажеті жоқ. Салымшы баспананы ертерек сатып алып, аралық заем рәсімдей алады.

Алайда жаңа мүмкіндік Отбасы банктің барлық ипотекалық заемына қолданылмайды. Ол банкпен арнайы келісім жасасқан құрылыс компанияларының тұрғын үйінен пәтер сатып алуға қатысты.

Банк әзірге BI Group, SAT NS және QazaqStroy компанияларымен ынтымақтастығын кеңейткенін хабарлады. Жаңа тетік осы серіктестердің тұрғын үй жобалары аясында қолданылады.

Отбасы банк мұндай тәсіл салымшыларға бағалау көрсеткішін көтеру үшін бірнеше ай күтпей, қолайлы пәтерді ертерек таңдауға мүмкіндік беретінін түсіндірді.

Сонымен қатар банк «Наурыз» бағдарламасы бойынша көктемде заемы мақұлданып, бірақ әлі баспана таңдап үлгермеген шамамен 2 мың адамның үй іздеу мерзімін ұзартты. Бұған дейін оларға баспана табуға алты ай уақыт беріліп, бұл мерзім 12 қарашада аяқталуы керек еді.

Яғни 15 қазаннан бастап енгізілген өзгерістің басты шарты – депозитте заем сомасының кемінде 50 пайызы болуы керек. Ал алты ай күтпеу мүмкіндігі әзірге банкпен келісім жасаған құрылыс компанияларының жобаларына қатысты.