Табыс қана емес: Қазақстанда жәрдемақы алатындардың шығыны да тексеріледі

2027 жылғы 1 қаңтардан бастап Қазақстанда отбасының мемлекеттік әлеуметтік көмекке мұқтаждығын бағалау кезінде оның табысымен бірге шығыны да ескеріледі. Банктер азаматтың және отбасы мүшелерінің келісімімен олардың шоттары мен депозиттері туралы мәлімет береді. Бұл туралы Еңбек және халықты әлеуметтік қорғау министрі Асқарбек Ертаев Құрылтай отырысында айтты.

«Екінші деңгейлі банктер алушының және отбасы мүшелерінің келісімімен банк шоттары мен депозиттері туралы мәлімет береді. Бұл жұмыс аясында кіріс те, шығыс та ескеріледі», – деді министр.

Депутат Наталья Рамазанова Отбасының цифрлық картасында әл-ауқат санаты қалай анықталатынын, отбасының шығыны ескеріле ме және материалдық жағдайы нашарласа, оның мәртебесі қаншалықты жылдам өзгеретінін сұрады.

Ертаевтың айтуынша, Отбасының цифрлық картасы мемлекеттік дерекқорлардағы мәліметтерді жинақтап, үй шаруашылығының жағдайын сегіз негізгі бағыт бойынша бағалайды. Жалпы саны 50-ден астам көрсеткіш ескеріледі. Олардың арасында жұмыспен қамтылу, табыс, жылжымалы және жылжымайтын мүлік, несие жүктемесі мен білім деңгейі бар.

«Осы мәліметтердің негізінде жүйе үй шаруашылығының материалдық және әлеуметтік жағдайын бағалап, оның санатын анықтайды», – деді министр.

Отбасы туралы мәліметтер 30 дерекқордан алынып, күн сайын жаңартылады. Ал отбасының әл-ауқат санаты ай сайын қайта есептеледі. Материалдық жағдайы нашарлаған жағдайда мемлекеттік қолдау шараларын алдын ала өтініш бергізбей тағайындау қарастырылған.

Банк құпиясына жататын мәліметтерді тексеру үшін азаматтың келісімі қажет. Мұндай талап Әлеуметтік кодекске енгізілген өзгерістерде көзделген.

Егер азамат деректерін тексеруге келісім бермесе, оған әлеуметтік қорғау шараларын тағайындаудан бас тартуға негіз болады. Ал қазір жәрдемақы алып жүрген азамат келісім бермесе, төлем уақытша тоқтатылады. Келісім берілген күннен бастап төлем қайта жалғасады.