Үкімет жәрдемақыны қысқартып, қанша қаржы үнемдемек

Қазақстан Үкіметі әлеуметтік көмекті отбасының мұқтаждығына қарай тағайындау арқылы 2027 жылы 700 млрд теңге, ал үш жылда шамамен 2,5 трлн теңге үнемдеуді жоспарлап отыр. Бұл туралы Премьер-министр Олжас Бектенов Құрылтайдың жалпы отырысында депутат Наталья Годунованың сұрағына жауап бергенде айтты.

2027 жылғы 1 қаңтардан бастап бірқатар мемлекеттік жәрдемақыны тағайындағанда азаматтың жеңілдік берілетін санатқа жататыны ғана емес, отбасының әл-ауқаты да ескеріледі. Үкімет мұндай тәсіл әлеуметтік көмекті оған шын мәнінде мұқтаж азаматтарға бағыттауға мүмкіндік береді деп есептейді.

Бектеновтің айтуынша, қазіргі жүйеде табысы жоғары және табысы төмен отбасыларға, соның ішінде көпбалалы отбасыларға бірдей қолдау көрсетіледі. Үкімет жаңа тәртіп арқылы бюджет шығынын азайтуды көздеп отыр.

Жаңа тәсіл бойынша мемлекет өзін өзі қамтамасыз ете алмайтын, қиын жағдайға тап болған азаматтарға басымдық бермек. Әлеуметтік қолдаудың мақсаты – мұқтаж отбасына қиын кезеңнен шығуға және кейін өз табысын табуына жағдай жасау.

Үкімет есебінше, өзгеріс 2027 жылдың өзінде шамамен 700 млрд теңге, ал үш жыл ішінде 2,5 трлн теңгеге жуық бюджет қаражатын үнемдеуге мүмкіндік береді.

2027 жылдан бастап жаңа тәртіп жәрдемақының он түріне қатысты болады. Алайда отбасының әл-ауқатын бағалау барлық әлеуметтік төлемге бірдей қолданылмайды.

Отбасының жағдайын анықтау үшін азаматтың дербес деректерін тексеруге келісімі қажет болады. Оның ішінде банк құпиясына жататын мәліметтер мен несие жөніндегі ақпарат та ескеріледі.