Ең төменгі жалақы 150 мың теңге бола ма? Жұманғарин жауап берді

Қазақстанда ең төменгі жалақыны 150 мың теңгеге дейін көтеру мәселесі әлі шешілген жоқ. Бұл туралы Премьер-министрдің орынбасары – Ұлттық экономика министрі Серік Жұманғарин Құрылтайдағы брифингте айтты.

Оның сөзінше, мәселе Үкімет пен Президент әкімшілігі деңгейінде талқыланып жатыр. Нақты шешім жақын арада белгілі болуы мүмкін, алайда Жұманғарин оның қашан қабылданатынын айтпады.

«Қазіргі кодекс бюджетті үш оқылымда қарауды көздейді. Сондықтан бұл мәселенің қалай шешіліп жатқанын білуге әлі уақыт бар. Бұл – жақын болашақтың мәселесі. Егер көтерілсе, келесі жылдан бастап көтеріледі», – деді ол.

Бір ай бұрын Ұлттық экономика бірінші вице-министрі Азамат Әмрин ең төменгі жалақыны көтеру мәселесі бюджет жобасын бірінші оқылымға дайындау кезінде тиісті комитетте талқыланатынын айтқан еді.

Құрылтай депутаты Татьяна Савельева да бюджет жобасы бірінші оқылымнан өткеннен кейін депутаттар салыстырмалы кестемен жұмыс істеп, ең төменгі жалақыны көтеру мәселесін қайта көтеретінін мәлімдеген.

Алайда 14 қазанда бірінші оқылымда мақұлданған 2027–2029 жылдарға арналған республикалық бюджет жобасында ең төменгі жалақыны көтеру әзірге қарастырылмаған.

Демек, ең төменгі жалақының 2027 жылы 150 мың теңгеге дейін өсетіні туралы түпкілікті шешім әлі жоқ.