Қазақстанда 529 мың адам жәрдемақыдан қағылуы мүмкін

Қазақстанда шамамен 529 мың адамның мемлекеттік жәрдемақы алу құқығы 2027 жылдан бастап қайта қаралуы мүмкін. Бұл туралы Премьер-министрдің орынбасары – Ұлттық экономика министрі Серік Жұманғарин Құрылтайдағы брифингте айтты.

Оның сөзінше, бұл – әзірге алдын ала есеп. Деректерді талдау жұмысы жалғасып жатыр.

«Қателеспесем, 529 мың адам. Оның 70 мыңға жуығы А санатында, қалғандары B санатында. Бірақ талдау жүріп жатыр. Тиісті азаматтарға хабарлама жіберіледі. Біз қателеспеуіміз керек», – деді Жұманғарин.

Отбасының әл-ауқаты тұрақты көрсеткіш ретінде белгіленбейді. Ол әр отбасының жағдайына және белгілі бір кезеңдегі деректерге қарай өзгеруі мүмкін. Мұқтаждықты анықтау үшін шамамен 30 цифрлық жүйедегі мәліметтер сараланып, отбасының жағдайы ай сайын қайта есептелмек.

Еңбек және халықты әлеуметтік қорғау министрлігі түсіндіру жұмыстарын жүргізу үшін елдің барлық 20 өңіріне жұмыс топтарын жібермек.

«Біреуге тиесілі көмекті бермей қойғаннан гөрі, азаматтың пайдасына қателескеніміз дұрыс. Мақсат – қалай да қаржы үнемдеу емес», – деді министр.

2027 жылғы 1 қаңтардан бастап Қазақстанда бірқатар мемлекеттік жәрдемақыны тағайындағанда отбасының мұқтаждығы ескеріледі. Өзгеріс А және B санатындағы отбасылар алатын кей төлемдерге қатысты болады. Олардың қатарында бала тууына, бала бір жарым жасқа толғанға дейін оның күтіміне және көпбалалы отбасыларға берілетін жәрдемақылар бар. Кей азаматтарға бұл шектеулер қолданылмайды.

Қолданыстағы бағалау әдістемесінде отбасын А немесе B санатына енгізетін бірыңғай табыс мөлшері жоқ. Отбасының жағдайы бірнеше өлшем бойынша жиналған ұпаймен анықталады. А санатына кемінде 1800 ұпай, B санатына 730-дан 1799 ұпайға дейін жинаған отбасылар кіреді.