Путинмен кездескен АҚШ өкілдері Киевке барып, Зеленскиймен келіссөз жүргізді

АҚШ президенті Дональд Трамптың өкілдері Стив Уиткофф пен Джаред Кушнер 6 қыркүйекте Киевте Украина президенті Владимир Зеленскиймен кездесіп, Ресей мен Украина арасындағы соғысты тоқтату жолдарын талқылады. Бұл – Уиткофф пен Кушнердің соғыс басталғалы Киевке жасаған алғашқы ресми сапары.

Киевте келіссөз үш кезеңмен өтті. Тараптар бейбіт келіссөздерді қайта жандандыру, Украинаға қауіпсіздік кепілдіктерін беру, әуе қорғанысын күшейту және қысқа дайындық кезінде энергетикалық инфрақұрылымды қорғау мәселелерін талқылады. Келіссөздің бір бөлігіне Ұлыбритания, Франция және Германияның қауіпсіздік жөніндегі өкілдері де қатысты.

Зеленскийдің айтуынша, аумақ мәселесі әлі де шешілмеген және мұндай күрделі мәселе мемлекет басшылары деңгейінде қаралуға тиіс. Украина тарапы соғыс қыс мезгілінде де жалғасуы мүмкін екенін ескеріп, АҚШ пен Еуропадан әуе қорғанысы мен энергетика саласына қосымша қолдау күтетінін жеткізді.

Уиткофф Киевтегі келіссөзді мазмұнды деп бағалады. Ал Кушнер АҚШ-тың мақсаты қазіргі соғысты тоқтатумен ғана шектелмей, ұзақ мерзімді бейбітшілікке жағдай жасау екенін айтты. АҚШ өкілдері Ресей мен Украина қатысатын үшжақты келіссөзді қайта бастауға үміттенетінін мәлімдеді. Әзірге келіссөздерден нақты келісім шыққан жоқ.

Бұған дейін, 5 қыркүйекте Уиткофф пен Кушнер Мәскеуде Ресей президенті Владимир Путинмен үш сағаттан астам келіссөз өткізген. Кремль өкілі Юрий Ушаков кездесуді пайдалы әрі мазмұнды деп бағалағанымен, тараптар нақты келісімге келген жоқ. АҚШ өкілдері соғысты реттеуге қатысты бірқатар ұсыныс айтқан, бірақ олардың мазмұны жарияланған жоқ.

Ресей мен Украина арасындағы соғысты тоқтатуға бағытталған бұған дейінгі келіссөздер де түпкілікті нәтиже берген жоқ. Тараптар арасындағы негізгі қайшылықтардың бірі – аумақ мәселесі.