Пара алып, алаяқтықпен айналысқан байланыс орталықтарын қорғаған: Украинада прокуратура қызметкерлеріне қатысты іс қозғалды

Украинада Бас прокурор кеңсесінің қызметкерлері алаяқтықпен айналысқан байланыс орталықтарының жұмысына кедергі келтірмеу үшін пара алып отырған деген күдікке ілінді. Елдің Сыбайлас жемқорлыққа қарсы ұлттық бюросы мен Мамандандырылған сыбайлас жемқорлыққа қарсы прокуратурасы қылмыстық ұйымның әшкереленгенін мәлімдеді, деп хабарлады BBC-дің орыс қызметі.

Тергеу дерегінше, 2025 жылдың ортасында Бас прокуратурадағы шенеуніктердің бірі алаяқтықпен айланысқан байланыс орталықтарына қамқорлық жасап, олардан ақша алып отырған топ құрған. Қылмыстық ұйымдағы негізгі рөлдердің бірін Бас прокурор кеңсесінің лауазымды қызметкері атқарды деген күдік бар.

Тергеу нұсқасы бойынша, топ мүшелері байланыс орталықтарының қызметіне араласпағаны үшін пара алып, кейін ақшаны түрлі қаржы тетіктері арқылы заңдастырған. Соның ішінде 20 млн гривнадан астам қаражатты, шамамен 447 мың долларды, жылжымайтын мүлік, зергерлік бұйымдар мен басқа да құнды заттар сатып алуға жұмсаған.

Бұдан бөлек, ұйым басшысы 12 млн гривнадан астам активті үшінші тұлғалардың атына рәсімдеген деген күдік бар. Оның арасында Карпаттағы танымал кешендердің біріндегі жылжымайтын мүлік те болған. Тағы 10 млн гривнадан астам қаражат туыстары мен жақындарының есепшоттарына аударылып, кәсіпкерліктен түскен табыс ретінде көрсетілген.

Қазір тергеу бес күдіктіні анықтады. Оларға қылмыстық ұйым құру және оның жұмысына қатысу, сондай-ақ қылмыстық жолмен алынған мүлікті заңдастыру айыптары тағылып отыр.

Жексенбіде Украинаның Жоғары сыбайлас жемқорлыққа қарсы соты Бас прокурор кеңсесінің халықаралық ынтымақтастық департаментінің басшысы Сергей Крапиваны қамауға алды. «Украинская правда» дереккөздеріне сүйеніп, Крапиваның тергеудегі негізгі тұлға екенін және демалыс күндері Бас прокурор кеңсесінде тінту жүргізілгенін жазды.

Бұқаралық ақпарат құралдары бұл іске Украина бас прокуроры Руслан Кравченконың да қатысы болуы мүмкін екенін хабарлаған. Алайда Кравченко мұны жоққа шығарып, заңсыз байланыс орталықтарына қамқорлық жасауға еш қатысы жоқ екенін, мұндай тапсырма бермегенін және Бас прокурор өкілеттігін бұл мақсатта пайдаланбағанын мәлімдеді.

Кравченко тергеуде аты аталған Бас прокурор кеңсесінің қызметкері міндетін атқарудан шеттетілгенін хабарлады. Сондай-ақ халықаралық ынтымақтастық департаменті мен киберқылмысқа қарсы бөлімшенің жұмысын тексеру тапсырылған. Заңсыз байланыс орталықтарына қатысты істермен айналысқан прокуратура қызметкерлері полиграф тексеруінен өтпек.

Бас прокурордың мәліметінше, соңғы бір жылда Украина құқық қорғау органдары 1050-ден астам тінту жүргізіп, шамамен 340 заңсыз байланыс орталығы мен 5 мыңнан астам жұмыс орнын жапқан.