Нұрай Серікбайдың өлімі: прокурор Шерхан Аймаханды өмір бойына соттауды сұрады

Шымкенттің мамандандырылған ауданаралық сотында Нұрай Серікбайдың өліміне қатысты іс бойынша сот жарыссөзі басталды. Мемлекеттік айыптаушы Шерхан Аймаханды өмір бойына бас бостандығынан айыруды сұрады.

Прокурор Мадияр Әбілқасымовтың айтуынша, сот барысында жәбірленуші тараптың берген айғақтары толық расталған. Сондай-ақ ол Серікбайдың Аймаханға ешқандай талабы жоқ екенін айтқан бейнежазбасын дәлел ретінде ескермеуді сұрады.

«Сараптама қыздың бейнежазбада алдын ала жатталған мәтінді айтқанын көрсетті. Оның бейнежазба кезінде мәтінді ұмытып қалғанын бәріміз көрдік. Құрметті сот, жазаны жеңілдететін мән-жайлар анықталған жоқ. Түпкілікті жаза ретінде өмір бойына бас бостандығынан айыруды сұраймын», – деді прокурор.

Бұған дейін 21 жастағы Нұрай Серікбай биыл 11 қаңтарда Шымкентте қаза тапқан. Тергеу нұсқасы бойынша, Шерхан Аймахан қызды ұзақ уақыт бойы аңдып, қылмысқа алдын ала дайындалған. Айыптау актісінде оның Нұрайға 35 рет пышақ сұққаны көрсетілген.

Аймаханға аса қатыгездікпен адам өлтіру, некеге тұруға мәжбүрлеу және адамның ізіне түсу бойынша айып тағылған. Сотта ол өзіне тағылған айыпты мойындамады.