Маск Қытайда не істеп жүр?

Tesla-ның басшысы Илон Маск компанияның Қытайдағы электр көліктерінде толық автономды жүргізу режимін (FSD) қосу мүмкіндігін талқылау үшін Бейжіңге келді. Бұл сапар Tesla халықаралық аренада бірқатар қиындыққа, соның ішінде АҚШ-тың электр көлігінің қауіпсіздігін  тексеруіне тап болған кезде жасалды, деп хабарлайды BBC.

АҚШ-тың Ұлттық жол қозғалысы қауіпсіздігі басқармасы (NHTSA) Tesla-ның автономды жүргізу режимдері кем дегенде 13 апатқа себеп болғанын айтады. Оның біреуі адам өлімімен аяқталды. 

Жергілікті БАҚ-тың хабарлауынша, Маск Қытайда FSD-ді белсендіріп қана қоймай, осы елде жиналған деректерді компания алгоритмдерін үйрету үшін шетелге тасымалдауды қалайды. АҚШ сияқты елдерде FSD қолжетімді болғанына қарамастан, Қытайда бұл технология әлі мақұлданған жоқ.

Қытай премьер-министрі Ли Цянмен кездесуі кезінде Маск Tesla-ның Қытаймен «терең ынтымақтастыққа» дайын екенін атап өтті. Бұған жауап ретінде премьер-министр Қытай нарығы шетелдік инвестиция үшін ашық болып қала береді деп сендірді.

Қытай Тесланың Америка Құрама Штаттарынан кейінгі екінші үлкен нарығы және Xpeng сияқты жергілікті автоөндірушілер ұқсас автономды жүргізу технологияларын енгізу арқылы бәсекелестікті арттыруда.

Маск сонымен қатар қытайлық автоөндірушілер «әлемдегі ең бәсекеге қабілетті» екенін мойындап, стратегиялық серіктестік пен инновацияның маңыздылығын атап өтті.

Tesla Қытай заңдарын сақтап, деректерді оқшаулау талаптарын қанағаттандыру үшін Шанхайда деректер орталығын құрды.

Технологиялық және нарықтық қиындықтарға қарамастан, Маск осы жылдың тамыз айында робототакси жобасын тезірек іске асыруға уәде берді.

Tesla-ның сатылымы 2024 жылдың бірінші тоқсанында 13%-ға төмендеген. Бұл бәсеке жоғары әрі өзгермелі электромобиль нарығында компанияға қысымның артқанын көрсетеді.