Латын әліпбиіне көшу қашан басталады? Тіл саясаты комитеті жауап берді

Қазақстанның қазақ әліпбиін латын графикасына көшіру мерзімі әзірге белгіленген жоқ. Бұл туралы Qrnews тілшісінің сұрағына жауап берген Ғылым және жоғары білім министрлігі Тіл саясаты комитеті төрағасының орынбасары Эльмира Асан мәлімдеді.

Оның айтуынша, қазір Ахмет Байтұрсынұлы атындағы Тіл білімі институты, Шайсұлтан Шаяхметов атындағы «Тіл-Қазына» ұлттық ғылыми-практикалық орталығы және жоғары оқу орындарының жетекші тіл мамандары латын графикасына негізделген қазақ әліпбиінің жобасы мен емле ережелерін жетілдіру жұмыстарын жүргізіп жатыр.

«Қазақ әліпбиін латын графикасына көшірудің кезең-кезеңімен атқарылатын жоспары латын графикасы негізіндегі қазақ әліпбиі мен орфография ережелері қабылданған соң әзірленеді. Оның нақты уақыты жоқ», – деді Эльмира Асан.

Ол сондай-ақ 2020 жылдан бері осы бағытқа бөлінген қаражаттың республикалық бюджетке қайтарылып жатқанын айтты.

Бұған дейін Қазақстанда қазақ әліпбиін латын графикасына көшіру мәселесі бірнеше жыл бойы талқыланып, әліпбидің бірнеше нұсқасы ұсынылған еді. Алайда қазіргі мәлімет бойынша, түпкілікті әліпби мен емле ережелері әлі қабылданған жоқ.