Қазақстанның үздік қарилары анықталды: бас жүлдеге автокөлік берілді

Ақтөбеде Құран Кәрімді жатқа және мәнерлеп оқудан өткен XV республикалық байқаудың жеңімпазы анықталды. Бірінші орынды Маңғыстау облысынан келген Рахымжан Ержанұлы иеленіп, жаңа автокөлік алды, деп хабарлады Қазақстан мұсылмандары діни басқармасы.

Екі күнге созылған жарысқа еліміздің әр өңірінен 80-ге жуық емес, 80 нақты қатысушы қатысты. Екінші орын алған Ұлытау облысының өкілі Ахмад Махмадраджабұлына 5 млн теңге, үшінші орын иеленген қызылордалық Нұртілеу Серікұлына 4 млн теңге берілді.

Төртінші орынға Ақтөбе облысынан Бекзат Дулатұлы ие болып, 2 млн теңге алды. Қарағанды облысының өкілі Мансұрхан Сарварханұлы бесінші орынға тұрақтап, 1,5 млн теңгемен марапатталды.

Бұдан бөлек, Құранды мәнерлеп оқу, сондай-ақ Құранның 20 және 10 парасын жатқа оқу бойынша сынға түскен қариларға да ақшалай сыйлық берілді.

Жарыстың ең жас қатысушылары – Шығыс Қазақстан облысынан келген 9 жастағы Ахмет Нұрланұлы мен Қарағанды облысының 9 жастағы өкілі Әбділәзиз Әбдулбасит «Көрермен көзайымы» атанды. Олардың әрқайсына 300 мың теңгеден берілді.

Марапаттау рәсімінде Бас мүфти Наурызбай қажы Тағанұлы жарысқа қатысқан қариларға, олардың ата-аналары мен ұстаздарына алғыс айтты.

«Бұл байқауда тек жүлде алғандар ғана жеңіске жеткен жоқ. Құран үшін жол жүріп келген әрбір қатысушы – жеңімпаз», – деді Бас мүфти.

Байқауды Қазақстан мұсылмандары діни басқармасы ұйымдастырды. Бас демеушісі – меценат Бахаридин Аблазимов.