Қазақстандықтарға заңсыз казино жарнамалатты деген өзбек блогері іздеуге жарияланды

Өзбекстандық танымал блогер Махмуд Хикматовқа халықаралық іздеу жарияланды. «Маха.dxb» деген атпен танылған блогер Қазақстанда заңсыз онлайн-казиноларды жарнамалауға қатысы бар деген күдікке ілінді, деп хабарлады Қаржылық мониторинг агенттігі.

Тергеу дерегінше, Хикматов заңсыз ойын алаңдарын ұйымдастырушыларға Қазақстандағы блогерлерді тауып беріп отырған. Ол блогерлердің парақшаларындағы қаралым, оқырмандардың орналасқан жері мен аудиториясы туралы мәлімет жинаған. Осы деректер негізінде жарнама құны белгіленген.

Агенттік мәліметінше, SultanGames, PINCO, Nomadcasino, Pin-Up және Vavada секілді ойын алаңдарын жарнамалауға 35-тен астам блогер тартылған.

Олардың арасында 6 тамызда Вьетнамнан Қазақстанға жеткізілген Қайсар Қамза да болған.

Сот Махмуд Хикматовты қамауға алуға рұқсат берді. Қаржылық мониторинг агенттігі оның жүрген жері туралы қандай да бір мәліметі бар адамдарды хабарласуға шақырды. Ақпарат берген адамның аты-жөні құпия сақталып, сыйақы берілетіні айтылды.