Қазақстандықтар Қытайда өз жүргізуші куәлігімен көлік айдай алатын болады

«Екіжақты келіссөздердің маңызды нәтижесі - Қазақстан мен Қытай азаматтарының ұлттық жүргізуші куәліктерін өзара тану және алмастыру бойынша қол жеткізілген келісім болды. Бұл екі ел азаматтары үшін тиісті процедураларды жеңілдетуге мүмкіндік береді және өзара сапарлар үшін барынша қолайлы жағдай туғызады», - делінген Қазақстан Республикасының Ішкі істер министрі Ержан Сәденов пен Қытай Халық Республикасының Қоғамдық қауіпсіздік министрі Ван Сяохунның келіссөздерінің қорытындысы бойынша жарияланған хабарламада.

Сонымен қатар екіжақты кездесудің тағы бір маңызды нәтижесі ретінде Қазақстан Республикасының Үкіметі мен Қытай Халық Республикасының Үкіметі арасындағы «Қорғас» халықаралық шекара маңы ынтымақтастық орталығының аумағында қауіпсіздік пен құқықтық тәртіп режимін қамтамасыз ету туралы келісімге қол қойылуы аталды.

«Құжатқа қол қою арқылы «Қорғас» орталығының аумағында қауіпсіздікті қамтамасыз етудің құқықтық механизмдерін қалыптастыру бойынша ұзақ мерзімді бірлескен жұмыс аяқталды. Келісім екі елдің құзыретті органдарының өзара іс-қимыл жасау тәртібін айқындайды және құқық бұзушылықтардың алдын алуға, туындайтын қатерлерге жедел әрекет етуге әрі халықаралық орталық аумағында азаматтардың қауіпсіздігін тиімдірек қамтамасыз етуге мүмкіндік береді», - деп атап өтті ведомстводан.