$ 456.56 € 530.52 ₽ 5.28

Қазақстан қазанда мұнай өндіру көлемін арттырмайды

Абдрахманов Мағжан
07 қыркүйек 2026, 10:05
Қазақстан қазанда мұнай өндіру көлемін арттырмайды Сурет авторы: gazeta.ru

Қазақстан ОПЕК+ келісімі аясында 2026 жылғы қазанда мұнай өндіру көлемін қыркүйектегі деңгейде сақтайды. Мұндай шешімді Қазақстан, Сауд Арабиясы, Ресей, Ирак, Кувейт, Алжир және Оман 6 қыркүйекте өткен онлайн-кездесуде қабылдады.

ОПЕК жариялаған кестеге сәйкес, Қазақстан үшін қазандағы мұнай өндіру көлемі тәулігіне 1,628 млн баррель деңгейінде белгіленген. Ресей үшін бұл көрсеткіш 9,949 млн, Сауд Арабиясы үшін 10,478 млн баррель болады.

Осылайша ОПЕК+ елдері мұнай өндіру көлемін алты ай қатарынан ұлғайтқаннан кейін өсімді уақытша тоқтатты. Қыркүйекте жеті ел өндірісті тәулігіне 188 мың баррельге арттыруға келіскен еді. Бұл 2023 жылы қабылданған тәулігіне 1,65 млн баррель көлеміндегі ерікті қысқартуды кезең-кезеңімен тоқтату үдерісін аяқтады.

Шешім әлемдік мұнай нарығындағы тұрақсыздық аясында қабылданып отыр. Иран төңірегіндегі әскери қақтығыс Ормуз бұғазы арқылы мұнай тасымалына кедергі келтіріп, әлемдік нарықтағы ұсынысқа қысым түсіріп отыр.

ОПЕК+ елдері нарықтағы жағдайды ай сайын бағалауды жалғастырады. Келесі кездесу 4 қазанда өтеді. Онда қараша айындағы өндіріс көлеміне қатысты шешім қабылдануы мүмкін.

#Мұнай

Соңғы жаңалықтар