Қазақстан бірінші ме, Қырғызстан ба: Көшпенділер ойындарының қорытынды есебіне қатысты дау шықты

VI Дүниежүзілік көшпенділер ойындары аяқталғаннан кейін жалпыкомандалық есепке қатысты дау шықты. Қазақстандық тарап таратқан мәліметте Қазақстан бірінші орында тұрса, жарысты ұйымдастырушылар жариялаған кестеде Қырғызстан көш бастаған.

Қазақстандық пабликтер таратқан есеп бойынша Қазақстан құрамасы 32 алтын, 20 күміс, 22 қола медальмен бірінші орын алған. Қырғызстан 30 алтын, 35 күміс, 19 қола жүлдемен екінші орында көрсетілген.

Алайда кейін Көшпенділер ойындарының ресми парақшасында басқа кесте жарияланды. Онда Қырғызстанда 30 алтын, 29 күміс, 13 қола, ал Қазақстанда 29 алтын, 16 күміс, 19 қола медаль бар деп көрсетілген. Ұйымдастыру комитеті осы нәтижені баспасөз мәслихатында да хабарлаған.

Қазақстан тарапы не дейді?

Қазақстанның Туризм және спорт министрлігі ұлттық құрама ойындарды 32 алтын медальмен бірінші орында аяқтағанын мәлімдеді. Министрлік мәліметінде Қырғызстанның еншісінде 30 алтын жүлде бар.

Қазақстандық журналистердің айтуынша, жарыстың соңғы күні, 6 қыркүйекте Қазақстан спортшылары тоғызқұмалақтан алған екі алтын мен мангаладан жеңіп алған бір алтын ұйымдастырушылар жариялаған қорытынды есепке кірмей қалған.

Осыдан кейін екі елдің жанкүйерлері әлеуметтік желіде жалпы есепке қатысты пікірталасқа түсті.

Ұйымдастырушылар кестені алып тастады

Жалпыкомандалық есепке қатысты сын көбейгеннен кейін Көшпенділер ойындарының ресми Instagram парақшасынан медаль кестесі өшірілген.

Кейін Қырғызстанның Дене шынықтыру және спорт агенттігі VI Дүниежүзілік көшпенділер ойындарының тұжырымдамасына сәйкес, елдердің жеңіп алған медальдары бойынша жалпыкомандалық есеп жүргізілмейтінін мәлімдеді.

Алайда жарыс басталғаннан кейін ұйымдастырушылар медаль есебін тұрақты түрде жариялап отырған.

Президент Қасым-Жомарт Тоқаев Қазақстан құрамасын Көшпенділер ойындарындағы табысты өнер көрсетуімен құттықтап, спортшылардың нәтижесін жоғары бағалады. Мемлекет басшысы жалпыкомандалық есепке қатысты дауға тоқталған жоқ.