Қазақстан азаматы Ресей–Украина соғысына адам тартқаны үшін 8 жылға сотталды

Орал қаласының тұрғыны Ресей–Украина соғысына жалдамалы жауынгер тартқаны үшін сегіз жылға бас бостандығынан айырылды. Бұл туралы Батыс Қазақстан облыстық сотының баспасөз қызметіне сілтеме жасап «Мой город» басылымы хабарлады.

Сот дерегінше, ер адам 2025 жылғы ақпан мен шілде аралығында Ресейге тұрақты барып, қарулы құрылым өкілдерімен байланыс орнатқан. Қазақстанда ол соғысқа жіберу үшін негізінен әлеуметтік жағдайы төмен азаматтарды іздеген.

Айыптау тарапының мәліметінше, ер адам соғысқа қатысқандарға бір реттік 2,5–3 млн рубль төлем, ай сайын шамамен 200 мың рубль жалақы және Ресей азаматтығын жедел рәсімдеуге көмектесуді уәде еткен.

Сотта жәбірленушілер мен куәгерлердің жауаптары, сондай-ақ мессенджерлердегі хат алмасулар дәлел ретінде ұсынылған. Сотталушы өзіне тағылған айыпты мойындамаған.

Сот оның әрекетін жалдамалыларды тарту және жалдамалыларды тартуға оқталу баптары бойынша саралап, сегіз жылға орташа қауіпсіздік мекемесіне қамауға үкім шығарды.

Үкім әзірге заңды күшіне енген жоқ және оған шағым берілуі мүмкін.