Қайрат Сатыбалдыға тиесілі болған қонақүй 12,7 млрд теңгеге сатылымға қойылды

Алматыда бұрын Қайрат Сатыбалдыға тиесілі болған DoubleTree by Hilton қонақүй кешені сатылымға шығарылды. Мемлекеттік мүлік тізіліміндегі мәлімет бойынша нысанның бастапқы бағасы 12,7 млрд теңге, шамамен 28 млн долларды құрайды.

Мемлекеттік электронды сауда алаңындағы ақпаратқа сәйкес, бағаны көтеру әдісімен өтетін сауда 25 қыркүйекке белгіленген. Аумағы 16 мың шаршы метрден асатын қонақүй Алматының орталығындағы Досмұхамедов көшесінде орналасқан. Нысанды Алматы қаласының мемлекеттік мүлік және жекешелендіру департаменті сатып отыр.

Қонақүй 2023 жылы мемлекет меншігіне өткен. Сол кезде Сыбайлас жемқорлыққа қарсы қызмет нысанды Қайрат Сатыбалдымен байланысты компания 2021 жылдың қарашасында сатып алғанын, кейін оның мемлекетке берілгенін хабарлаған.

DoubleTree by Hilton қонақүйін салған компанияның иесі Шолпан Қаранеева бұған дейін кәсібінің заңсыз тартып алынғанын мәлімдеген. Ол осы жағдайға байланысты Қайрат Сатыбалдының да есімін атаған.

Қайрат Сатыбалды – Қазақстанның бұрынғы президенті Нұрсұлтан Назарбаевтың жиені. Ол 2022 жылдың наурызында ұсталып, сол жылдың қыркүйегінде «Қазақтелеком» және «Көліктік сервис орталығынан» аса ірі көлемде қаражат жымқыру ісі бойынша алты жылға бас бостандығынан айырылған. 2024 жылдың тамызында сот жазасының өтелмеген бөлігін пробациялық бақылаумен бостандығын шектеу жазасына ауыстырды.

Сыбайлас жемқорлыққа қарсы қызметтің мәліметінше, 2022 жылдан бері Қайрат Сатыбалды мен онымен байланысты тұлғалар мемлекетке жалпы құны 732,8 млрд теңгеден асатын активтер мен қаражат қайтарған. Олардың қатарында «Қазақтелекомдағы» үлес, жылжымайтын мүлік, автокөліктер, бағалы бұйымдар, компаниялардағы активтер және шетелден қайтарылған қаражат бар.