Қаржылық мониторинг агенттігі атын жамылғандар медицина мекемесінің басшысынан ақша бопсалаған

Түркістан облысында өздерін Қаржылық мониторинг агенттігінің қызметкерлері ретінде таныстырып, медицина ұйымы басшысынан 15 млн теңге алуға әрекеттенген екі адам ұсталды, деп хабарлады ҚМА.

Агенттік мәліметінше, күдіктілер «анықталған заңбұзушылықтарды» сылтау етіп, медицина мекемелерінің басшыларын қылмыстық жауапкершілікке тартамыз деп қорқытқан. Кейін ақша берілген жағдайда жауапкершіліктен құтылуға көмектесеміз деп уәде еткен.

Түркістан облысындағы жағдай бойынша екі адам медициналық ұйым басшысынан 15 млн теңге талап еткен. Олар 5 млн теңгені алғаннан кейін қалған 10 млн теңгені беруді сұраған.

8 тамызда күдіктілерді Түркістан облысы бойынша Экономикалық тергеп-тексеру департаменті мен ҚМА-ның Өзіндік қауіпсіздік департаментінің қызметкерлері қылмыс үстінде ұстады.

Сот күдіктілерді қамауда ұстауға санкция берді. Қазір тергеу жалғасып жатыр.

ҚМА мұндай алаяқтық жағдайлары міндетті әлеуметтік медициналық сақтандыру саласындағы қаражат жымқыру деректерін анықтау жұмыстары жүріп жатқан тұста жиілегенін мәлімдеді.

Агенттік азаматтарды жауапкершілікке тартамыз деп қорқытып немесе жазадан құтылуға көмектесеміз деп ақша талап еткендерге сенбеуге шақырды. Мұндай жағдайлар туралы 1458 нөмірі арқылы ҚМА байланыс орталығына хабарлауға болады.