Грузия көрерменін тәнті еткен Түркістан театры Батумиде аншлаг жасады

Түркістан музыкалық-драма театрының өнер ұжымы Грузия елінің арнайы шақыртуымен Батуми қаласында гастрольдік сапармен жүр, деп хабарлайды Түркістан облысы әкімдігінің баспасөз қызметі. Жас өнер ұжымы Илья Чавчавадзе атындағы мемлекеттік кәсіби драма театрының сахнасында ұлы ақын әрі философ Абай Құнанбайұлының «Қара сөздері» негізінде сахналанған «Абай. Қара сөз» пластикалық спектаклін көрермен назарына ұсынды.

Айтулы мәдени шараға Түркістан облысы әкімінің орынбасары Ертай Алтаев, Қазақстан Республикасының Батуми қаласындағы Құрметті консулы Гиоргий Абашидзе, Қазақстан Республикасының Грузиядағы Елшілігінің үшінші хатшысы Риза Садық, сондай-ақ Грузия Мәдениет министрлігі Мәдениет департаментінің басшысы Нино Лосаберидзе, Батуми мемлекеттік драма театрының директоры Коте Мзавия және жергілікті мәдениет саласының өкілдері қатысты.

Жиын барысында Түркістан облысы әкімінің орынбасары Ертай Кенжебекұлы Қазақстан мен Грузия арасындағы ғасырлар бойы жалғасып келе жатқан рухани ынтымақтастық пен достық қарым-қатынастың маңызына тоқталып, грузин халқына қазақ өнеріне көрсеткен зор құрметі үшін алғыс білдірді.

Грузиялық көрермендер мен өнер сүйер қауым түркістандық театр әртістерінің шеберлігін ерекше ілтипатпен қабылдады. Қойылым режиссері - Мадина Мұратпекова, композиторы - Хамит Шанғалиев. Спектакльдің ерекшелігі - Абайдың терең философиясын сөзбен ғана емес, сахналық қозғалыс, пластика және дене тілі арқылы жаңаша форматта жеткізуінде.

Бес күндік гастрольдік сапар аясында «Абай. Қара сөз» спектаклінің екінші көрсетілімі де өтеді. Бұл сапар екі ел арасындағы достық пен ынтымақтастықты одан әрі нығайтып, мәдени-рухани байланыстарды дамытуға зор үлес қосады.