Енді жемқорлардың туыстарынан да мүлік тәркіленуі мүмкін

Мәжіліс депутаты Марат Бәшімов Қазақстанда “кеңейтілген конфискация” тетігін заңға енгізуді ұсынды. Бұл өзгеріс қабылданса, жымқырған ақшасын жақындарының атына аударып, байлығын сақтап жүрген жемқор шенеуніктер жазадан құтылып кете алмайды.

Қазір көптеген лауазымды тұлға заңсыз тапқан мүлікті туыстарының, көңілдестерінің немесе таныстарының атына рәсімдеп, өздері түрмеде отырса да, байлығын сақтап қалады. Ал “кеңейтілген конфискация” қабылданса, олардың заңсыз жолмен жиналған мүлкі кімнің атына жазылса да, түгел тәркіленуі мүмкін.

Бұл бастама ақшаның қайдан келгенін дәлелдей алмаған адамнан мүлікті тәркілеуді көздейді. Яғни тергеу кезінде адамға өзінің барлық дүние-мүлкін қалай тапқанын түсіндіру міндеті жүктеледі. Егер дәлелдей алмаса — мемлекет меншігіне өтеді.

Марат Бәшімовтің айтуынша, бұл норма тек жоғары лауазымды шенеуніктер мен мемлекеттік басқару қызметін атқаратын тұлғаларға қолданылады. Ол бұл өзгерісті шынайы әділеттілікке қадам деп бағалап отыр.

Жақында  бұл норма қаржыны заңсыз жолмен жылыстатуға қарсы заң жобасының аясында Мәжілісте қаралмақ.