Елімізде фонограмма пайдалануға шектеу енгізіледі

Мәжіліс депутаттары мәдениет, білім, отбасы және мемлекеттік бақылау мәселелері бойынша заңға Сенат енгізген түзетулерді мақұлдады.

Енді концерттерде фонограмманы пайдалану кезінде ұйымдастырушылар көрермендерді алдын ала ескертпесе ғана айыппұл салынады. Бұл талап тек концерттік іс-шараларға қатысты, ал театр мен цирк қойылымдарында фонограмманы техникалық қажеттілік ретінде қолдануға рұқсат етіледі.

Жаңа нормаға сәйкес, көрерменді ескертпей фонограмма қолданғандарға 1000 айлық есептік көрсеткішке дейін (2025 жылы шамамен 3,9 млн теңге) айыппұл салынады. Заң талаптарының орындалуын әкімдіктер бақылайды.

Мәжілістің әлеуметтік-мәдени даму комитеті хабарлағандай, Сенат түзетулер енгізгенімен, олар заңның негізгі мәнін өзгертпейді. Тек кейбір баптардың күшіне ену мерзімі мен балаларға арналған ұйымдарға мемлекеттік бақылау шараларын қолданыстағы заңнамамен сәйкестендіру мақсатында нақтылаған.

Құжат сондай-ақ мынадай жаңалықтарды қамтиды:

• – шетелдік білім бағдарламалары түлектеріне міндетті еңбек өтелімін кейінге қалдыру мүмкіндігі;

• – халықаралық байқаулардың жеңімпаздарына біржолғы ақшалай сыйақы төлеу;

• – жекеменшік білім ұйымдарына ат беру тәртібін нақтылау.