The Finiko қаржы пирамидасының күдіктісі Түркиядан Қазақстанға жеткізілді

Қаржылық мониторинг агенттігінің Алматы қаласы бойынша департаменті Интерполмен бірлесіп, The Finiko қаржы пирамидасының құрылымдық бөлімшесін басқарды деген күдікке ілінген әйелді Түркиядан Қазақстанға жеткізді. Ол 2022 жылдан бері халықаралық іздеуде болған, деп хабарлады агенттік.

Тергеу дерегінше, The Finiko нақты кәсіпкерлік немесе инвестициялық қызметпен айналыспаған. Бұрын қосылған қатысушыларға төлем жаңа салымшылардан түскен қаражат есебінен жасалған.

«Мұндай тәсіл табыс түсіп жатқандай көрініс қалыптастырып, азаматтардың қаражатын одан әрі тартуға мүмкіндік берген. Күдіктінің заңсыз әрекеті салдарынан қаржы пирамидасына салымшылардың 160 млн теңгеден астам қаражаты тартылған», – делінген агенттік хабарламасында.

221 млн теңгелік жер мемлекетке өтті

Сотқа дейінгі тәркілеу аясында күдіктіге тиесілі құны 221 млн теңге болатын жер телімі мемлекет кірісіне алынған.

Бұған дейін осы қылмыстық іс бойынша тағы үш адам сотталған. Оларға мүлкін тәркілей отырып, алты жылға дейін бас бостандығынан айыру жазасы тағайындалған.

The Finiko туралы не белгілі?

The Finiko компаниясы 2021 жылғы шілдеде қаржы пирамидасы деп танылған. Компания азаматтарға салған қаражатының ай сайын 150 пайызына дейін сыйақы беруге уәде еткен. Ең төменгі салым мөлшері 500 доллар болған.

Компания сайтындағы дерек бойынша, оған Қазақстан, Ресей, Қырғызстан, Армения, Беларусь, Өзбекстан, Түркия және басқа елдерден 165 мыңнан астам адам қаражат салған.