Әлемдік мұнайдың 4 пайызына қауіп төнді: Brent 107 доллардан асты

Таяу Шығыстағы жаңа шабуылдардан кейін әлемдік мұнай бағасы 3 пайыздан астам өсті. 14 қыркүйектегі саудада Brent маркалы мұнайдың қараша айындағы келісімшарттары барреліне 107,82 долларға дейін қымбаттады, деп хабарлады Reuters.

WTI маркалы мұнай да 3 пайыздан астам өсіп, барреліне 103 доллар шамасына жетті. Нарықтағы жаңа өсім Сауд Арабиясының мұнай инфрақұрылымына жасалған шабуылдар мен Ормуз бұғазындағы жағдайдың қайта шиеленісуіне байланысты.

Сауд Арабиясының маңызды мұнай құбыры жабылды

Мұнай бағасына әсер еткен негізгі факторлардың бірі – Сауд Арабиясындағы Шығыс – Батыс мұнай құбырының уақытша жабылуы. Ұзындығы шамамен 1 200 шақырым болатын құбыр Парсы шығанағындағы мұнайды Қызыл теңіз жағалауындағы Янбу портына жеткізеді. Осы арқылы Сауд Арабиясы Ормуз бұғазын айналып өтіп, мұнай экспорттай алады.

Құбыр ұшқышсыз ұшу аппаратымен жасалған шабуылдан кейін жабылды. Reuters дерегінше, ол соңғы уақытта тәулігіне шамамен 4 млн баррель мұнай тасымалдаған.

Егер құбыр жақын күндері қайта іске қосылмаса, әлемдік мұнай жеткізілімінің 4 пайызына дейінгі бөлігіне қауіп төнуі мүмкін. Янбу портындағы қор Сауд Арабиясына қазіргі экспорт көлемін тағы бес-жеті күн сақтауға жетеді. Құбырды қалпына келтіруге қанша уақыт кететіні әзірге белгісіз: Reuters дереккөздері бірнеше күннен бес-алты аптаға дейінгі мерзімді атаған.

Ормузда кемеге шабуыл жасалды

Мұнай нарығындағы алаңдаушылықты Ормуз бұғазындағы жаңа оқиға да күшейтті. Ұлыбританияның теңіз қауіпсіздігі қызметі бұғаз арқылы өтіп бара жатқан кемеге белгісіз снаряд тигенін хабарлады. Соққыдан кейін кемеде өрт шығып, экипаж қауіпсіз жерге көшірілген.

Ормуз арқылы кеме қозғалысы да бұрынғы деңгейден әлдеқайда төмен. Соғысқа дейін бұғаздан тәулігіне шамамен 125 коммерциялық кеме өтсе, қазір қозғалыс бірнеше есе азайған.

Осының бәрі әлемдік нарықта мұнай жеткізілімі одан әрі қысқаруы мүмкін деген қауіп туғызып отыр. Brent өткен аптаның өзінде 100 доллардан жоғары көтерілген еді. Енді Сауд Арабиясындағы маңызды балама бағыттың жабылуы нарыққа қосымша қысым түсірді.