Таиландқа баратын қазақстандықтарға маңызды өзгеріс: жаңа тәртіп 15 қыркүйекте күшіне енеді

15 қыркүйектен бастап Қазақстан азаматтарының Таиландта визасыз жүру мерзімі 60 күннен 30 күнге қысқарады. Бұл туралы Қазақстанның Таиланд Корольдігіндегі елшілігі хабарлады.

Енді Қазақстан азаматтарына екі ел үкіметтері арасындағы ұлттық төлқұжат иелерін визалық талаптардан босату туралы келісімнің талаптары қолданылады.

«Қазақстан азаматтары Таиландта елге кірген күннен бастап күнтізбелік 30 күнге дейін визасыз бола алады. Бұл ретте әрбір 180 күн ішінде елде болған жалпы мерзім 90 күннен аспауға тиіс», – делінген хабарламада.

30 күннен ұзақ қалатындар виза рәсімдеуі керек

Елшілік Таиландқа сапар жоспарлаған қазақстандықтарға жаңа көші-қон тәртібін ескеруге кеңес берді.

Егер сапар 30 күннен ұзаққа созылса, азаматтар алдын ала тиісті виза рәсімдеуі қажет.

Таиланд Министрлер кабинеті бекіткен жаңа тәртіп 15 қыркүйекте күшіне енеді.