Сұлулық өнімдерінің жасырын қаупі: L’Oreal қатерлі ісік тудыруы мүмкін

АҚШ-тың Аризона штаты әлемге танымал L’Oreal косметикалық гигантына қатысты ресми түрде сотқа арыз түсіріп, халықаралық брендті сотқа берген алғашқы штат атанды. Штаттың прокуратурасы брендті тұтынушылардың құқықтарын өрескел бұзды және өнімнің денсаулыққа төндіретін қаупін әдейі жасырды деп айыптауда.

Сот талап-арызында компанияның шашты химиялық жолмен тегістеуге арналған танымал құралдары онкологиялық аурулардың туындауына тікелей ықпал етуі мүмкін екені айтылған. Прокуратура өкілдерінің сөзінше, L’Oreal бұл өнімдерді сату кезінде олардың аналық без бен жатырдың қатерлі ісігіне алып келу қаупі бар екендігі туралы ескертулерді қасақана жасырып келген.

Бұл шулы істің басталуына 2022 жылы АҚШ-тың Ұлттық денсаулық сақтау институттары жүргізген ауқымды ғылыми зерттеу түрткі болды. Сарапшылардың мәліметінше, Dark and Lovely, Optimum және өзге де брендтермен шығарылатын шашты біржола тегістегіш құралдарды жиі қолданған әйелдерде жатыр рагының даму қаупі екі еседен астам жоғарылаған.

Қазіргі уақытта Чикагоның федералды сотында L’Oreal компаниясына қарсы зардап шегуші тұтынушылардан түскен 12 мыңнан астам ұқсас арыз-шағым біріктіріліп, ауқымды сот процесі ретінде қаралуда. Аризона штатының билігі соттан компанияға ірі көлемде айыппұл салуды, келтірілген шығындарды өтеуді және аталған өнімдердің сатылымына түбегейлі тыйым салуды талап етіп отыр.

Өз кезегінде L’Oreal USA компаниясының ресми өкілдері тағылған айыптауларды толығымен жоққа шығарды. Компания басшылығы өз өнімдерінің қауіпсіздігіне сенімді екенін және берілген искілердің ғылыми әрі заңды негізі жоқ екенін хабарлады.