Депутаттық сауалға жауап бере алмаған шенеуніктер Құрылтайға шақырылуы мүмкін

Қазақстанда депутаттық сауалдардың сапасы мен пәрменділігін арттыруға бағытталған жаңа Регламент қабылданды. Жаңа құжат мемлекеттік органдар мен лауазымды тұлғалардың халық қалаулылары қойған сауалдарға қатысты жауапкершілігін едәуір күшейтеді.

Бұл туралы брифинг барысында Конституциялық заңнама, сот жүйесі және құқық қорғау органдары комитетінің төрағасы Үнзила Шапақ мәлімдеді. Комитет төрағасы журналистердің қойған сұрақтарына жауап бере отырып, бұдан былай депутаттық сауалдар тек формалды құрал болып қалмайтынын, олардың орындалуын бақылаудың тиімді тетіктері қарастырылғанын атап өтті.

Жаңа Регламентке сәйкес енгізілген негізгі өзгерістер:

•  Міндетті мерзім: Сауал жолданған лауазымды тұлға 1 (бір) ай ішінде толық әрі нақты жауап беруге міндетті.
•  Жария талқылау: Егер депутат алынған жауапты толық емес немесе мардымсыз деп тапса, тиісті лауазымды тұлғаны Құрылтай отырысына шақыруға құқылы.
•  Ашық диалог: Отырыс барысында мәселе жария түрде талқыланып, өзге де депутаттардың қосымша сұрақтар қоюына жағдай жасалады.

Сонымен қатар депутаттық сауалды жолдау даярлығы да қатаңдай түсті. Мәселе Үкіметке жолданбас бұрын фракциялар деңгейінде жан-жақты зерделеніп, оның негізділігі мен дәйектілігі алдын ала тексеріледі.

Үнзила Шапақтың айтуынша, бұл реформа депутаттық сауалды көтерілген мәселені соңына дейін жеткізудің және мемлекеттік органдармен нәтижелі ықпалдастық орнатудың басты құралына айналдырады. Ең бастысы, бұл өзгерістер Құрылтайдың мемлекеттік органдар қызметіне жүргізетін бақылау функциясын жаңа деңгейге көтереді.