Бомбардиро Крокодило мен Тралалеро Тралала: Оқу-ағарту министрлігі жасанды интеллект жасаған мультфильмдерге алаңдаушылық білдірді

ҚР Оқу-ағарту министрлігінің Балалардың құқықтарын қорғау комитеті интернетте таралып жатқан кейбір мультфильмнің қауіпті екенін айтып, алаңдаушылық білдірді.

Мультфильм кейіпкерлері – Бомбардиро Крокодило, Тралалеро Тралала және басқа да анимациялық бейнелер TikTok секілді әлеуметтік желілерде кең таралып, миллиондаған қаралым мен лайк жинап жатыр. Олар жасанды интеллект арқылы жасалған, ал дыбысталуы – итальян тілінде. Желі қолданушылары бұл видеоларды аударған кезде мазмұнының шынайы сипатына таң қалған.

Аудармаларға сүйенсек, Бомбардиро Крокодило – «Газа мен Палестинадағы балаларды бомбалап жүретін ұшатын аллигатор» деп сипатталған. Сондай-ақ кейіпкерлердің сипаттамасында бірқатар балағат сөздер мен Құдайға тіл тигізетін қорлау мазмұндар кездеседі.

«Комитет интернетте балаларға арналған сияқты көрінетін, бірақ ішінде жасырын түрде деструктивті мазмұн бар анимациялық видеолардың таралуына алаңдайды. Мұндай бейнежазбалар балалар санасына бұрмаланған, агрессияға жетелейтін және негізгі адамгершілік құндылықтарды жоққа шығаратын ұғымдарды сіңіруге тырысады», – делінген ресми хабарламада.

Осыған байланысты комитет қазіргі цифрлық ортадағы қауіптерді ескере отырып, нормативтік базаны жетілдіруге қатысты ұсыныстар дайындап жатыр. Бұл ұсыныстар Мәдениет және ақпарат министрлігіне, сондай-ақ Ішкі істер министрлігіне жолданатын болады.

Министрлік ата-аналарға балалары қандай контент көріп жүргеніне, кіммен сөйлесетініне және интернетте қандай тақырыптарды талқылайтынына мұқият болуды ескертеді.

«Баламен үнемі ашық сөйлесіп, оның сыни ойлау қабілетін дамытыңыз. Күдікті контент анықталған жағдайда бірден тиісті органдарға хабарлаңыз. Цифрлық ортада баланың қауіпсіздігі – ең алдымен ата-ананың белсенді қатысуына байланысты», – деп атап өтті ведомство.