Бір тамшы су да, бір тиын да берілмейді: фермерлерге қатаң ескерту жасалды

Елдің оңтүстік өңірлерінде су тапшылығы күшеюі мүмкін. Үкімет отырысында Премьер-Министрдің орынбасары Қанат Бозымбаев аймақтарда су дефициті 1 млрд текше метрге дейін жетуі мүмкін екенін мәлімдеді.

Бозымбаевтың айтуынша, Шардара су қоймасына келетін су көлемі өткен жылмен салыстырғанда 43% азайған, ал Нарын–Сырдария каскадындағы ірі қоймаларда 3,8 млрд текше метрге кем су бар.

Осыған байланысты Үкімет вегетациялық кезеңді тұрақты өткізу үшін су ресурстарын қатаң реттеуге көшеді.

Премьер-Министр Олжас Бектенов су лимитін сақтау басты талап екенін ерекше атап өтті.

«Су ресурстары министрлігі бекітілген лимиттен артық су беруді болдырмауы керек. Ауыл шаруашылығы министрлігі егіс алқаптарын әртараптандыру графигін бекітті. Енді барлық жұмыс сол графикке сай жүргізіледі. Мысалы, шаруашылыққа 100 гектар лимит берілсе, егер ертең 1 гектарға артық ексе, біз бір тамшы су бермейміз», – деді ол.

Үкімет басшысы фермерлерді алдын ала ескертті.

«Ауыл шаруашылығы министрлігі бекіткен көрсеткіштерді бұзған жағдайда шаруалардың шығыны бюджеттен өтелмейді. Бір теңге де төленбейді. Мұны халыққа ашық айту керек», – деді Бектенов.

Үкімет су тапшылығы жағдайында егіс құрылымын қайта қарап, суды көп қажет ететін дақылдарды қысқартуды жалғастыруды тапсырды.