Атырауда ауа ластанды: әкім кәсіпорындарды тексеруді тапсырды

Атырау облысының әкімі Болат Ақшолақов қала ауасының ластануына себеп болуы мүмкін кәсіпорындарды тексеруді тапсырды. Бұған дейін түнгі уақытта қаланың бірнеше бөлігінде ауадағы зиянды заттардың мөлшері рұқсат етілген шектен асқаны анықталған, деп хабарлады облыс әкімдігі.

Соңғы күндері Атырау тұрғындары әлеуметтік желіде ауа сапасының нашарлап, қаланың бірнеше ауданында өткір иіс сезілгенін жаппай жазған. Осыдан кейін облыс әкімі Атырау мұнай өңдеу зауытының өкілдері қатысқан кеңес өткізіп, ауа сапасының нашарлау себебін анықтауды тапсырды.

Облыстық санитариялық-эпидемиологиялық бақылау департаменті басшысының орынбасарының мәліметінше, сағат 22:00-ден таңғы 07:00-ге дейін жүргізілген өлшеулер кезінде қаланың бірқатар бөлігінде күкіртсутек пен көміртек тотығының мөлшері рұқсат етілген шектен асқан. Әкімдік нақты көрсеткіштерді жарияламады.

«Ақ Жайық» басылымының жазуынша, дүйсенбі күні таңғы сағат 05:00 шамасында Жилгородок ауданында AirKZ жүйесі күкіртсутектің мөлшерін текше метріне 96,7 микрограмм деп көрсеткен. Рұқсат етілген шекті мөлшер – 8 микрограмм. Яғни көрсеткіш 12 еседен астам жоғары болған.

Ақ Шағала шағынауданында таңғы сағат 04:00-де күкіртсутек мөлшері текше метріне 24,6 микрограммға, яғни шекті деңгейден шамамен үш есе жоғары көрсеткішке жеткен. Ал тұрғындар жариялаған дерек бойынша, Авангард шағынауданында бұл көрсеткіш текше метріне 60 микрограмм болған.

Әкімдік анықталған жағдайларға байланысты атмосфералық ауаның ластануына себеп болуы ықтимал кәсіпорындарды тексеруге қажетті құжаттарды дайындау тапсырылғанын хабарлады.

Сонымен қатар Болат Ақшолақов ауа сапасын бақылайтын өңірлік жүйе құру жөнінде ұсыныс әзірлеуді тапсырды. Онда қажетті қаржы көлемі, техникалық талаптар мен іске асыру мерзімі көрсетілуге тиіс. Ластанудың барлық ықтимал көзін жан-жақты тексеру де тапсырылған.

Бұған дейін Экология департаменті 31 тамыз бен 6 қыркүйек аралығында Атыраудың бірнеше нүктесінде ауа сапасын тексерген. Сол кезде күкіртсутек, күкірт диоксиді, көмірсутек және көміртек тотығы бойынша рұқсат етілген шекті мөлшерден асу дерегі анықталмаған.