Алматыда Әзербайжан мен Арменияның жабық келіссөзі өтіп жатыр

10 мамыр күні Алматы қаласында Әзербайжан және Армения сыртқы істер министрлерінің жабық келіссөзі басталды. Бұл туралы ҚР Сыртқы істер министрлігі хабарлады. 

СІМ баспасөз қызметінің хабарлауынша, Әзербайжан сыртқы істер министрі Жейхун Байрамов пен Армения сыртқы істер министрі Арарат Мирзоянды Алматыдағы Достық үйінде Қазақстан премьер-министрінің орынбасары, сыртқы істер министрі Мұрат Нұртілеу қарсы алды. Министрлер кездесу рәсіміне қатысу үшін Дөңгелек залға өткен. 

Осы залда 1991 жылы Тәуелсіз мемлекеттер достастығын құруға мұрындық болған Алматы декларациясына қол қойылған.

"Қазақстан араағайын рөлін атқаруға тырыспастан, "гуд офис" форматында бейтарап түрде ізгі қызмет көрсету миссиясын орындауға дайын. Әзербайжан мен Армения біз үшін жақын ел ғана емес, маңызды стратегиялық әріптес. Бізді сан ғасырлық достық, өзара түсіністік пен ортақ тарих біріктіреді", - деді Қазақстан сыртқы істер министрі Мұрат Нұртілеу.

Әзербайжан сыртқы істер министрі екі ел арасында бейбіт келісімді дайындау процесінде жүйелі кездесулер маңызды орын алады деді.

"Соңғы рет делегациялар екі айдан астам уақыт бұрын Берлинде кездескен. Кейінгі кездесуден бері тараптар бейбіт келісімнің жобасы бойынша комментарий алмасты, бұған қоса келіссөз процесінің түрлі аспектілері бойынша тараптардың ұстанымын көрсететінін белгілі бір құжаттармен алмасты. Соңғы келіссөздерден кейінгі маңызды элемент – Әзербайжан мен Армения арасындағы мемлекеттік шекараның бір бөлігін делимитациялауға жол салған хаттамаға қол қойылды", - деді Жейхун Байрамов.

"Армения бейбітшілікке, бейбіт келісімге қол қоюға ұмтылады, біз келіссөз процесіне конструктивті түрде қатысып жатырмыз. Бұған қоса біз тек бейбіт келісімге қол қоюмен шектеліп қалмауымыз керек, мұнымен қоса біз аймақтағы барлық транспорттық инфрақұрылымды ашуымыз керек", - деді Армения сыртқы істер министрі Арарат Мизоян.

Қос тарап та кездесуді ұйымдастырған Қазақстанға алғыс айтты және кездесудің Алматы декларациясы қабылданған жерде өтуіне ерекше мән берді.

Осы сөздерден соң екі елдің сыртқы істер министрлері жабық келіссөзге кіріп кетті.

Қазақстан СІМ келіссөз нәтижесі туралы ақпарат бермейтінін, себебі Астана келіссөздерге қатыспайтынын хабарлады. Меймандар да баспасөзге ешқандай ақпарат бермейді.