Абай облысында мыңдаған адамның өмірін арашалайтын бірегей жүрек орталығы бой көтеруде

Абай облысының Үржар ауданында халыққа жедел әрі мамандандырылған медициналық көмек көрсету сапасын арттыруға бағытталған маңызды инфрақұрылымдық жоба жүзеге асырылуда. Елді мекенде ауылдық денсаулық сақтауды жаңғыртуға арналған ұлттық жоба шеңберінде Тері арқылы коронарлық араласу (ТКА) орталығының құрылысы жүргізілуде.

Медициналық инфрақұрылым және техникалық жабдықталуы

Жобаның жалпы келісімшарттық құны 3,1 миллиард теңгені құрайды. Бас мердігер – «AKM Invest Group» ЖШС. Жаңа орталық 12 төсек-орынға есептелген жеке қосымша ғимаратта орналасады. Нысан құрылыс-монтаж жұмыстарының бекітілген кестесіне, сапа стандарттарына және қауіпсіздік талаптарына сәйкес салынып жатыр. Қазіргі таңда құрылыс жұмыстары аяқталу сатысында.

Орталықтың материалдық-техникалық базасы жоғары дәлдікті диагностика мен емдеуге арналған заманауи медициналық құрал-жабдықтармен қамтамасыз етіледі:

 

Қан тамырларының жағдайын нақты уақыт режимінде зерттеуге және операторлық ем жүргізуге арналған ангиограф аппараты;

 Барлық палаталарға арналған жасанды тыныс алу аппараттары (ЖТА);

Пациенттердің өмірлік маңызды көрсеткіштерін үздіксіз бақылайтын жеке мониторлар.

Өңірлік қажеттілік және географиялық факторлар

Қазіргі уақытта Үржар және Мақаншы аудандары бойынша 57 519 тұрғынға медициналық қызмет көрсетіледі. Қызмет көрсету радиусы 410 шақырымнан асады. Медициналық желінің құрамына:

 Үржар ауданында: 15 дәрігерлік амбулатория, 6 фельдшерлік-акушерлік және 13 медициналық пункт;

 Мақаншы ауданында: 9 дәрігерлік амбулатория, 2 фельдшерлік-акушерлік және 6 медициналық пункт кіреді.

Сонымен қатар, жергілікті медицина мекемелері 16 шекара бекетіне, 3 комендатураға, шекара әскери құрылымдарының жеке құрамы мен олардың отбасыларына, сондай-ақ «Жалаңашкөл» көмір разрезінің жұмысшыларына қызмет көрсетеді.

Аумақтағы медициналық жүктемені арттыратын тағы бір негізгі фактор – Алакөл шипажайлық-туристік аймағы. Жазғы маусымда өңірге 1 миллионнан астам демалушы келеді, бұл шұғыл медициналық көмекті қажет ететін жағдайлардың жиілігін арттырады.

«Алтын сағат» және шұғыл көмектің маңыздылығы

Қазіргі таңда шұғыл жүрек-қан тамырлары операциялары қажет науқастар 175 шақырым қашықтықтағы Аягөз қаласындағы орталыққа жеткізіледі. Алыс елді мекендерден тасымалдау, жол инфрақұрылымы мен ауа райы жағдайлары шұғыл медициналық көмек көрсету ұзақтығына тікелей әсер етеді. Облыс орталығы Семей қаласына дейінгі қашықтық 560 шақырымды құрайды.

Үржар ауданының көпсалалы орталық аудандық ауруханасы бас дәрігерінің міндетін атқарушы Аманжол Искаковтың мәліметінше, 2025 жылы Үржар ауданынан Аягөз қаласына жүрек-қан тамырлары аурулары асқынған 189 пациент тасымалданған.

«Миокард инфарктісі кезінде алғашқы «алтын сағаттың» маңызы айрықша. Науқасқа неғұрлым жедел медициналық көмек көрсетілсе, жүрек бұлшықетінің зақымдану көлемін азайтып, адам өмірін сақтап қалу мүмкіндігі соғұрлым жоғары болады. Тері арқылы коронарлық араласу (ТКА) әдісі кеуде қуысын ашпай-ақ, білезік немесе шап артериясы арқылы катетер мен баллон жеткізіп, тамыр саңылауын кеңейтуге және стент орнатуға мүмкіндік береді», – деп атап өтті Аманжол Искаков.

Үржар ауданында ТКА орталығының іске қосылуы шалғай өңір тұрғындары мен қонақтары үшін жоғары технологиялық медициналық көмектің қолжетімділігін арттырып, шұғыл жағдайларда тасымалдау уақытын айтарлықтай қысқартуға жағдай жасайды.