1 млрд теңге шығын: Салықтан жалтарған қылмыстық топтың мүшесі Оңтүстік Кореядан қайтарылды

Оңтүстік Кореядан салықтан жалтару ісі бойынша күдікке ілінген Ұлан Байболов Қазақстанға экстрадицияланды. Тергеу дерегінше, ол мүше болған қылмыстық топ кәсіпорындардың есепшоттары арқылы 2,5 млрд теңгеден астам қаражатты қолма-қолға айналдырған. Бұл туралы Қаржылық мониторинг агенттігі хабарлады.

Тергеу дерегінше, Байболов салық пен бюджетке төленетін басқа да міндетті төлемдерден жүйелі түрде жалтарумен айналысқан ұйымдасқан қылмыстық топтың мүшесі болған.

Агенттік мәліметінше, топ кәсіпорындарды сатып алып, оларды жалған басшылардың атына қайта тіркеген. Кейін олардың банк шоттары арқылы қаржы операцияларын жүргізіп, салық есептілігіне көрінеу бұрмаланған мәліметтер енгізген және ақшаны қолма-қол ақшаға айналдырған.

Осы тәсілде пайдаланылған кәсіпорындардың бірі – «Сфера» серіктестігі. Ұлан Байболов 2014 жылы оның директорының орынбасары болып тағайындалған. ҚМA дерегінше, топ мүшелері серіктестіктің есепшоттарынан 2,5 млрд теңгеден астам қаражатты қолма-қол ақшаға айналдырған. Қосымша есептелген салық көлемі 1 млрд теңгеден асқан.

Қазір күдікті қамауда. Тергеу жалғасып жатыр.