Жаңа тренд: Квадробер деген кімдер?

Жасөспірімдер арасында жаңа тренд белең алуда. Қала көшелерінен бет жүзін маскамен бүркемелеп, жануар бейнесіне енген жастарды көрсеңіз таң қалмаңыз. Әлеуметтік желіде адамдарды таңданысқа түсіріп, танымал болған субмәдениет қоғамда көкейтесті мәселенің біріне айналуы мүмкін.

Сырт бейнесімен қоса тамақтану тәртібін, іс-қимылын жануар болмысына салу жаңа өсіп келе жатқан бүлдіршіндер арасында өтпелі болса да өзекті болып тұр. Өздерін “квадробер” атаған оқушылардың жаңа тенденциясы әлеуметтік желіде қызу талқыға түсіп жатыр. Ит-құстың тілінде сөйлеуге тырмысу, төрт аяқтап көше кезу жас буынға қаншалықты өзекті болуы мүмкін? Ортада өзін еркін ұстаған, жаңашылдыққа жасқанбаған балалардың бұл әрекеті психологиялық тұрғыда кері әсер беруі әбден мүмкін.

Біз таңданған жаңа үрдіс бастауын сонау екі мыңыншы жылдары спорттық бағыттан алған. 100 метрді 17,47 секундта төрт аяқтап жүгіріп өткен жапондық спринтер Кеничи Ито Гиннестің рекордтар кітабына енген. Маймыл адам атанған жас спортшы жаңа бағыттың алдағы уақытта Олимпиада ойындарына енгізілуіне ниетті.

Аталмыш бағыт 2020 жылы да әлеуметтік желіде танымал болған. Десек те, осы жылдың қыркүйек айынан бастап қаралым аясы мен қолданысы жиілеген. Оған себеп – көршілес Ресей елінің танымал әртісі Мия Бойканың концерті. Жас квадробер қызбен сахнада болған жағдаяттан кейін әнші әрекетіне қоғам наразылығы көбейді. Көршілес мемлекетте қызу талқыға түскен оқиға әлеуметтік желіде квадробер түсінігінің кеңістігін қалыптастырып үлгерді.

Елімізде де жыртқыш жануардың жаратылысына ұқсауға тырысқан жас буынның өзгеше әрекеттері әлеуметтік желі қолданушыларының наразылығын тудырды. Өздерін екі топқа бөліп қарастырған бүлдіршіндердің кейбірі сырт бейнесі мен спорттық жағынан қызығатынын айтса, кей түрлерінің адамға шауып, тістеуі мүмкін екендігін ескертеді. Мұндай жағдай еліміздің бас қаласы Астанада да орын алды. Қала тұрғындары орталық саябақтардың бірінен балалардың ойынынан өзгеше әрекеттер байқаған. Көрші елден енген қаңсық  түсінік  ел жастарына таңсық күйде трендке енуде. Тик ток желісінде квадробер жасөспірімдердің  Астана қаласымен бірге Алматы, Ақтау қала көшелерінде кездескені туралы видеолар тарауда. Желі қолданушыларының көп бөлігі елге енді еніп келе жатқан трендке наразылығын білдірген. Әлеуметтік желіні ақтарып отырсаңыз, жаңа трендке қатысты жасалған әзілкеш әңгіме мен видеоларға да көзіңіз түседі. “Бізде квадробер болғанбыз” – деп салынған фотосуреттер 80 – жылдардағы балабақша суреттерінен тұрады.

Квадроберлер феномені – қазіргі заманауи мәдениет пен адамның өзін-өзі тануының ерекше көрінісі. Олардың таңдауы адамның сан алуандығы мен өзіндік идентификацияның шексіз мүмкіндіктерін көрсетеді, бұл қоғамның қабылдау қабілетін одан әрі зерттеуді қажет ететін қызықты тақырып екендігін айқындайды.

Зере Әліпбекқызы