Жаңа Ташкент: Өзбекстанның астанасы қалай өзгермек?

Өзбекстан президенті Шавкат Мирзиёев 9 қазанда Ташкент қаласының бас жоспарының жобасымен танысты, деп хабарлады Өзбекстан президентінің баспасөз қызметі.

Қазіргі уақытта Ташкент қаласының аумағы 43 822 гектарды құрайды, ал халық саны 3 миллионнан асты. Болашақта бұл көрсеткіштер сөзсіз өседі. Осыған байланысты Ташкент қаласының 2045 жылға дейінгі бас жоспары әзірленді.

Мемлекет басшысы 2022 жылы осы бағыттағы алғашқы әзірлемелермен танысқан болатын. Оның берген нұсқаулары мен ұсыныстары негізінде жоба жетілдірілді. "ТошкентбошпланЛИТИ" кәсіпорнында Сингапур, Ұлыбритания, Түркия, Германия, Қытай және Нидерланд компанияларымен бірлесіп ауқымды жұмыстар жүргізілді.

Жобаға сәйкес, Ташкент қаласының аумағы 3 аймаққа бөлінеді. Консервация аймағында мәдени мұра нысандарының, тарихи орындардың, ғимараттардың және жасыл аймақтардың сақталуы қамтамасыз етіледі. Реконструкция аймағында мастер-жоспарлар негізінде қосымша құрылыс жүргізу мүмкіндігі қарастырылған. Реновация аймағында ескі үйлердің, ғимараттардың орнына жаңа құрылыстар салу және олардың жөндеу жұмыстары жүзеге асырылады.

Бүгінде экология және көлік мәселелері өзекті болып отыр. Соңғы он жылда Ташкентте орташа ауа температурасы 1 градусқа көтерілді. Кейбір күндері атмосферадағы ластаушы заттар нормадан асып түседі. Көліктер саны күннен-күнге артып, жол қозғалысы қиындап келеді.

Бұл аспектілер жаңа бас жоспарда ескерілген. Атап айтқанда, Ташкент қаласы мен оның маңындағы жасыл аймақтардың көлемі үш есеге ұлғайтылып, 25 мың гектарға жеткізіледі деп жоспарлануда. Осылайша, жан басына шаққандағы жасыл аймақ 3 шаршы метрден 6 шаршы метрге дейін артады.

Қала құрылысы талаптарына сәйкес, тұрғындар жақын маңдағы балабақшаға, мектепке, ауруханаға, сауда және қызмет көрсету орындарына 15 минут ішінде жетуі қажет. Осыған байланысты қоғамдық көлік желісі кеңейтіліп, түйіндер мен аялдамалар саны арттырылмақ. Жаңа жолдар салынып, метробус бағыттары ұйымдастырылады.

Соңғы жылдары қаланың өсуіне байланысты Ташкенттің электр энергетикалық, су құбыры және кәріз инфрақұрылымы үлкен жүктемемен жұмыс істеп келеді. Бас жоспар жобасында олардың қуаттылығын арттыру шаралары қарастырылған.

Бас жоспар бекітілгеннен кейін оның карталары Геоинформациялық жүйенің Қала құрылысы кадастрында және Ташкент қаласы әкімдігінің веб-сайтында ашық түрде қолжетімді болады.

Жауапты тұлғалар бас жоспардың негізгі көрсеткіштері туралы баяндады.

Мемлекет басшысы Ташкентті халық саны 7,5 миллион адамнан асатын ірі мегаполиске айналдыру қажеттігін атап өтті. Кибрай, Зангиата, Юқоричирчик, Уртачирчик және Ташкент аудандарын астанамен біртұтас агломерация негізінде дамыту бойынша тапсырмалар берілді.