«Таза Қазақстан – Таза Астана» байқауының жеңімпаздары марапатталды

2025 жылдың 3 шілдесінде, Елорда күні қарсаңында және «Жұмысшы мамандығы жылы» аясында журналистер мен блогерлер арасында өткен «Таза Қазақстан – Таза Астана» байқауының жеңімпаздары салтанатты түрде марапатталды.

Байқау 2025 жылғы 15 мамыр мен 30 маусым аралығында өтті. Оған 118 журналист, блогер мен шығармашылық тұлғалар қатысып, 130-дан астам материал ұсынған. Жобаның негізгі мақсаты – экологиялық мәселелер мен қалалық тазалықты насихаттау, қоғамның назарын осы тақырыптарға аудару және еңбек адамы мен коммуналдық сала қызметкерлерінің еңбегін журналистика арқылы көрсету болды.

«Астана Тазалық» ЖШС бас директоры Замир Сагинов салтанатты жиында сөз сөйлеп, тазалық ұғымының тек санитарлық емес, рухани мағынасы бар екенін атап өтті.

«Тазалық – тек санитарлық ұғым емес, бұл – сана мен тәрбие. Таза сана – таза қала. Қоғамның тазалыққа қатысты көзқарасын саналы түрде өзгертуіміз керек. БАҚ өкілдерінің еңбегі – осы өзгеріске үлес қосатын маңызды қадам», – деді ол.

Оның айтуынша, биылғы байқауға қатысушылар саны өткен жылмен салыстырғанда екі есе артқан. Бұл тақырыптың өзектілігін және қоғамның оған белсенді үн қосып жатқанын көрсетеді.

Байқау мынадай критерийлер бойынша бағаланды:

• Тақырыптың өзектілігі мен қоғамдық маңыздылығы;

• Материалдың тереңдігі мен шынайылығы;

• Жазу стилі мен құрылымының сапасы;

• Авторлық көзқарас пен шығармашылық ерекшелік.

Қазылар алқасының құрамына ақпарат саласының танымал өкілдері енді. Олар үздік жұмыстарды іріктеп, авторлардың кәсібилігіне жоғары баға берді.

Сонымен қатар «Астана Тазалық» компаниясының Бас директорының арнайы сыйлығы – «Ең үздік креатив» иегеріне табыс етілді.

Жеңімпаздар мен жүлдегерлерге сыйлықтар мен марапаттар табысталды. Олардың қатарында «Астана Тазалық» брендтік сыйлықтары да бар. Байқау қоғамда экология мен тазалық мәселелеріне деген жауапкершілікті арттыруға бағытталған. Компания бұл бастаманы жыл сайын дәстүрге айналдыруды көздеп отыр.