Silk Way Star жеңімпазы белгілі болды

Астанада Президент жанындағы Орталық коммуникациялар қызметінде халықаралық Silk Way Star вокалдық конкурсының гранд-финалына арналған баспасөз конференциясы өтті. Бұл — 12 елдің үздік орындаушыларын біріктірген алғашқы азиялық мегажоба болды.

Финал нәтижесі бойынша Моңғолия өкілі Мишель Жозеф жеңімпаз атанды. Оған көрермендер мен қазылардың жоғары бағасы бұйырды. Дауыс беру қорытындысы аралас жүйе бойынша жүргізілді: 50% – көрермен дауысы, 50% – қазылар алқасының бағасы.

Байқауға қатысушыларға 508 287 көрермен дауыс берген. Бұл аймақтағы вокалдық тележобалар тарихындағы ең жоғары көрсеткіштердің бірі саналады.

«Silk Way Star Азияның мәдени алуан түрлілігін біріктіріп, музыка арқылы елдер арасындағы түсіністік пен диалогтың жаңа деңгейін көрсетті. Көрермендердің белсенділігі — халықаралық форматтарға деген үлкен қызығушылықтың дәлелі», – деді «Jibek Joly / Silk Way» телеарнасының басқарушы директоры Еркежан Күнтуған .

Көрермендер дауыс беруінің нәтижесі төмендегідей болды:

• Мишель Жозеф (Моңғолия) – 112 241 дауыс
• Мадинабону Адылова (Өзбекстан) – 85 443
• Чжан Хэ Сюань (Қытай) – 73 662
• Язмин Азиз (Малайзия) – 73 609
• Саро Геворгян (Армения) – 73 160
• Автандил Абесламидзе (Грузия) – 46 027
• ALEM (Қазақстан) – 32 145

Барлығы 43 елдің көрермендері дауыс беруге қатысқан. Ең белсенді елдердің қатарында Қазақстан, Қытай, Моңғолия, АҚШ, Ресей, Түркия және Малайзия бар .

Silk Way Star финалы Jibek Joly телеарнасында тікелей эфирде, сондай-ақ Қырғызстан, Әзербайжан, Тәжікстан, Моңғолия және басқа елдердің телеарналарында көрсетілді. Жалпы эфир мен стримингтік платформалар арқылы шамамен 120 миллион көрермен байқауды тамашалады .