«Шабыт – 2025» халықаралық байқауының жеңімпаздары анықталды

Астанада 2025 жылғы 18–22 қараша аралығында өткен шығармашыл жастардың ХХVIII халықаралық «Шабыт» байқауы мәресіне жетті. Биыл байқауға Қазақстанның барлық өңірінен және шетелдерден келген 800-ден астам жас талант қатысып, түрлі өнер бағыттарында бақ сынады.

Бұл жоба дарынды жастарды қолдауға, олардың кәсіби дамуына мүмкіндік жасауға және халықаралық мәдени ынтымақтастықты нығайтуға бағытталған еліміздегі ең ірі шығармашылық алаңдардың бірі саналады. Байқаудың халықаралық қазылар алқасы Қытай, Ресей, Түркия, Италия, Қырғызстан және Өзбекстаннан келген танымал музыканттар мен өнер қайраткерлерінен құралды.

Фестиваль аясында қатысушылар байқау кезеңдерінен өтіп, шеберлік сабақтарына, шығармашылық зертханалар мен концерттерге қатысты. Арнайы ұйымдастырылған білім беру бағдарламасы жас орындаушыларға кәсіби режиссерлер, композиторлар мен көркемөнер мамандарынан тікелей тәжірибе алуға мүмкіндік берді.

«Шабыт – 2025» жеңімпаздары:
– Камералық хор: Гран-при – Татарстан Республикасы Мемлекеттік камералық хоры.
– Хор дирижері: Гран-при – Даурен Мусин.
– Академиялық ән және концертмейстерлік шеберлік: Гран-при – Фируза Рахметова, Аяжан Шынболат.
– Камералық музыка: Гран-при – Ақбике Алғи, Ілияс Өзбеков.
– Фольклорлық ансамбль: Гран-при – «Тарлан» этно ансамблі.
– Эстрадалық вокал: Гран-при – трио Moonaisun.
– Поэзия: Гран-при – Дәурен Тілеухан.
– Креативті бағыт: Гран-при – Қамза Бөкейхан.

Жеңімпаздарға берілетін жүлде қоры: Гран-при – 3 млн теңге, І орын – 1 млн теңге, ІІ орын – 750 мың теңге, ІІІ орын – 500 мың теңге.

Биылғы байқау жас өнерпаздардың шығармашылық әлеуетін көрсетіп, жаңа есімдердің танылуына жол ашты. «Шабыт» жобасы 30 жылға жуық уақыт ішінде мыңдаған жас өнер иесінің кәсіби қалыптасуына ықпал етіп келеді.

Ұйымдастырушылар: Қазақстанның Мәдениет және ақпарат министрлігі, Астана қаласы әкімдігі, «Мәдени іс-шараларды өткізу дирекциясы» және Күләш Байсейітова атындағы Қазақ ұлттық өнер университеті.