«Самұрық-Қазына» 21 триллион теңгені қайда жұмсайды: Тоқаев қор басшысына бірқатар міндет жүктеді

Президент Қасым-Жомарт Тоқаев «Самұрық-Қазына» АҚ басқарма төрағасы Нұрлан Жақыповты қабылдады. Кездесуде қордың қызметі, негізгі өндірістік және қаржылық көрсеткіштердің орындалуы, сондай-ақ ірі инфрақұрылымдық жобалардың жүзеге асырылуы талқыланды.

Нұрлан Жақыповтың айтуынша, қор 2026 жылы жалпы құны 3,2 трлн теңгені құрайтын инвестициялық жобаларды аяқтауды жоспарлап отыр.

Олардың қатарында Мойынты – Қызылжар және Дарбаза – Мақтаарал теміржол желілерін салу, Алтынкөл – Жетіген және Бейнеу – Маңғыстау теміржол учаскелерін жаңғырту, Қашаған кен орнындағы газ өңдеу зауытын салу, Алматыдағы екінші жылу электр орталығын жаңғырту бар.

Сондай-ақ Түркістан облысында бу-газ қондырғысы мен гибридті электр станциясын салу жобасы жүзеге асырылып жатыр. Астанадағы деректерді өңдеу орталығының құрылысы мен Каспий теңізінің табаны арқылы талшықты-оптикалық байланыс желісін төсеу жұмыстары аяқталуға жақын.

Қордың инвестициялық портфеліне сәйкес, 2027–2029 жылдары энергетика, мұнай-газ, көлік және цифрлық инфрақұрылым салаларында жалпы құны 21 трлн теңге болатын 38 жобаны іске асыру жоспарланған.

Кездесуде қордың әлеуметтік жобалары да сөз болды. Нұрлан Жақыпов медициналық және әлеуметтік нысандар салуға басымдық беріліп отырғанын жеткізді. Мүгедектігі бар балаларға арналған 55 орталық және 46 инклюзия кабинеті ашылған. Сонымен бірге спорт және білім беру инфрақұрылымын дамыту жұмыстары жалғасып жатыр.

Кездесу қорытындысында Мемлекет басшысы қор жұмысының негізгі бағыттары бойынша бірқатар тапсырма берді.