Салық кодексіне жаңа өзгерістер ұсынылды: не өзгеруі мүмкін

Ұлттық экономика министрлігі Салық кодексіне өзгерістер енгізуді көздейтін заң жобасын қоғамдық талқылауға шығарды. Ведомствоның хабарлауынша, түзетулер жаңа кодекс қолданысқа енгізілгеннен кейін анықталған мәселелерді, сондай-ақ бизнес пен мемлекеттік органдардың ұсыныстарын ескере отырып әзірленген.

Цифрлық активтен түскен табысқа жеңілдік ұсынылды

Жобаға сәйкес, қазақстандық қызмет көрсетушілер арқылы цифрлық активтермен жасалған операциялардан табыс тапқан жеке тұлғаларды жеке табыс салығынан босату ұсынылады. Бұл жеңілдікті 2026 жылғы 1 қаңтардан 2028 жылғы 31 желтоқсанға дейін қолдану көзделген.

Сонымен бірге жауапкершілігі шектеулі серіктестік құрылтайшылары мен акционерлік қоғам акционерлеріне өзін-өзі жұмыспен қамтығандарға арналған арнаулы салық тәртібін қолдануға тыйым салу ұсынылып отыр.

«Алтын виза» иелеріне бөлек салық тәртібі енгізілуі мүмкін

Түзетулерде «Алтын виза» иелері мен олардың отбасы мүшелеріне жеке салық салу тәртібін белгілеу қарастырылған.

Сондай-ақ «Астана» халықаралық қаржы орталығының инвесторларынан Қазақстан резиденті мәртебесін растайтын құжат бергені үшін алынатын 7000 айлық есептік көрсеткіш көлеміндегі алымды алып тастау ұсынылды.

Инвесторларға инфрақұрылым салуға кеткен шығындарын салық төлемдері есебінен өтеуге мүмкіндік беру де қарастырылып отыр.

Инвестициялық жобаларға бұрынғы жеңілдіктер қайтарылуы мүмкін

Басым инвестициялық жобалар мен инвестициялық келісім жасасқан компаниялар үшін бұрын қолданылған жекелеген салық нормаларын қалпына келтіру ұсынылған.

Екінші деңгейлі банктердің факторинг және форфейтинг операцияларын қосылған құн салығынан босату да түзетулер қатарында бар.

Бұған қоса, кәсіпкерлерге тауарларды таңбалауға нақты жұмсаған шығысының 150%-ына тең соманы салық салынатын кірістен шегеруге рұқсат беру ұсынылды.

Ауыл шаруашылығындағы ҚҚС жеңілдігі біртіндеп қысқаруы мүмкін

Ауыл шаруашылығы өндірушілеріне берілетін ҚҚС бойынша 80% қосымша есепке алу жеңілдігін кезең-кезеңімен азайту ұсынылып отыр. Бұл тетікті 2035 жылға қарай толық тоқтату көзделген.

Мұнайға салық есептеу тәртібі де өзгеруі мүмкін

Салық есептеу кезінде мұнайдың әлемдік бағасын Brent бағасынан қазақстандық KEBCO сұрпына берілетін жеңілдікті шегеру арқылы анықтау ұсынылды.

Жекелеген кен орындары үшін пайдалы қазбаларды өндіру салығының төмендетілген мөлшерлемелерін қолдануға өтпелі кезеңді сақтау да қарастырылған.

Сонымен қатар энергетикалық сусындарды экспорттау кезінде акцизден босату шарттарын нақтылау ұсынылды.

Тағы қандай өзгерістер бар

Түзетулер әлеуметтік салық шегерімдерін қолдану, орындалмаған міндеттемелер бойынша кірісті тану және бейрезиденттердің қаржылық қарыздардан түсетін табысын салық салуға қатысты.

Бұдан бөлек, электронды шот-фактураларды рәсімдеу мерзімі мен тәртібін, бейрезидент үшін төленген ҚҚС-ты есепке жатқызу тәртібін нақтылау және Қазақстан резиденттігі туралы сертификат беруді қайта енгізу ұсынылған.

Жоба 25 қыркүйекке дейін қоғамдық талқылауда болады. Өзгерістердің салыстырмалы кестесі «Ашық НҚА» порталында жарияланған.

Бұған дейін шілдеде Үкімет Салық кодексіне 45 түзетуден тұратын топтаманы ұсынған. Оның ішінде цифрлық активтерден түскен табысты жеке табыс салығынан босату, тауарларды таңбалауға жұмсалған шығынды шегеру және инвестициялық жобаларды қолдау жөніндегі ұсыныстар болған.