«Руың кім» комедиясы бір апта өтпей жатып прокаттан алып тасталды

Қазақстандық «Руың кім» комедиясы прокатқа шыққаннан кейін бар болғаны бір апта өткен соң кинотеатрлардан алып тасталды. Бұл туралы Tiger Films продюсрелік орталығы ресми хабарлады.

«“Руың кім” фильмі 18 желтоқсаннан бастап белгілі себептерге байланысты еліміздің барлық кинотеатрларында көрсетілмейді. Бізбен бірге болып, қолдау білдіргендеріңізге алғыс айтамыз», – делінген компанияның мәлімдемесінде.

Фильмнің басты актері Қайрат Әділгерейдің айтуынша, комедияның тоқтатылуына оның рулық араздық тудыруы мүмкін деген пікірлер себеп болған.

«Кейбіреулер тизерге қарап, фильмді дұрыс түсінбей жатыр. Шын мәнінде, картина руға бөлінуді емес, керісінше, бірлік пен татулықты насихаттайды. Киноны соңына дейін көрмей, қандай ой бар екенін білу қиын», – деді актер әлеуметтік желідегі жазбасында.

10 желтоқсанда жарық көрген фильм аз уақыт ішінде үлкен қызығушылық тудырып, бір аптада 208 миллион теңгеден астам табыс жинаған.

Комедияны Tiger Films студиясы түсірген. Бас продюсер – Ерлан Бұхарбаев, сценарий авторлары – Нұржан Еркінұлы мен Жалғас Елеусінов, қоюшы режиссер – Жұмақан Асет.

Әлеуметтік желілерде «Кімнің руына тиді екен?» немесе «Жалайыр мен шапырашты үшін емес шығар» деген секілді пікірлер кең тарады.