Ресей қандай жағдайларда ядролық қару қолдануы мүмкін: Путин айтып берді

Мәскеу өзінің жаңартылған ядролық доктринасы аясында ядролық қаруды қолдануға себеп болатын жағдайлардың тізімін кеңейтті. Ресей президенті Путин тіпті қарапайым қарумен Ресейдің егемендігіне "критикалық қауіп" төндірген жағдайда, қарымта ретінде ядролық қару қолданылады деп айтты. Оның сөзін Кремль жариялады.

Путиннің айтуынша, құжаттың жаңартылған нұсқасында кез келген ядролық қаруы жоқ мемлекет ядролық мемлекеттің қатысуымен немесе қолдауымен Ресейге қарсы агрессия тудыратын болса, мұны олардың Ресей Федерациясына бірлескен шабуылы ретінде қарастыру ұсынылады.

"Одақ мемлекетінің мүшесі ретінде Ресей мен Беларусьқа агрессия жасалған жағдайда, біз ядролық қару қолдану құқығын өзімізде қалдырамыз", – деді Путин.

Ядролық қару қолдану құқығы "егер дұшпан қарапайым қару қолданып, Ресейдің егемендігіне критикалық қауіп төндіретін болса да" болады.

"Ресейдің ядролық қару қолдануға көшу шарттары нақты. Әуе шабуылы қаруларының жаппай ұшырылуы және олардың біздің мемлекеттік шекарамыздан өтуі туралы сенімді ақпарат алған жағдайда, біз бұл мүмкіндікті қарастырамыз", – деді ол стратегиялық немесе тактикалық ұшақ, қанатты зымыран, дрондар, гипер дыбыстық және басқа да ұшақтарды меңзеп.

Ол сондай-ақ доктринаның барлық түсіндірмесін "терең тексерілген әрі Ресей Федерациясына қарсы заманауи әскери қауіп-қатерлерге сәйкес" деп атады. Сонымен қатар ол Мәскеудің ядролық қаруды қолдануға қатысты мәселелерге жауапкершілікпен қарайтынын айтып, "ядролық күштерді қолдану – елдің егемендігін қорғаудың ақырғы шарасы" деп мәлімдеді.

BBC-дің орыс қызметінің жазуынша, Путиннің бұл мәлімдемесі батыс елдері Украинаға Ресейге қарсы ұзақ қашықтықтағы қару-жарақпен соққы беруге рұқсат бере ме деген пікірталас тұсында айтылды. Путин бұған дейін Мәскеудің мұндай шешімге қатаң жауап беретініне уәде берген. Ол Киевке Ресей аумағына соққы беруге рұқсат беру Украинадағы соғысқа НАТО елдерінің тікелей қатысуын білдіреді деп мәлімдеген еді.