Президенттік дебат: Байден мен Трамп шайқасы

27 шілде күні Атлантада Американың қазіргі президенті Джо Байден мен экс-президент Дональд Трамптың арасында дебат өтеді. 

Қос қатысушы ешқандай суфлер мен дайындалған мәтіндерсіз бір жарым сағат бойы тікелей эфирде пікір таласады.

2024 жылдың алғашқы президенттік пікірталасы жөнінде шетелдік БАҚ өкілдері түрлі әңгіме таратып жатыр. Мәселен, 9News осы дебаттың алдында Трамп Филадельфияға барып, халыққа үгіт-насихат жүргізіп жатса, Байден көрермен көзіне көрінбеуге тырысып жүр деп сынады. Бірақ Джоның партиясы мұны бейсенбі күні өтетін нағыз "соғысқа" дайындық деп ақтады. 

Жүргізілген сауалнамалардың нәтижесі бойынша дауыс берушілердің 75% пайызы Джо Байденді президент есебінде көргісі келмейді. Бірақ бұл Трампқа берілген дауыстар да емес. Көпшілікке Джоның елді басқарғаны ұнамайды. 

Республикалықтар мен демократтар арасындағы талас жөнінде CNN "Трампқа тиісер болса, олар алдымен оған тағылған айыптардан бастайды. Дональдтың Дэниелспен болған дауын Джо міндетті түрде айтады" деп жазды.

Көп уақыт өтпей Байден өзінің ресми арнасында қысқаша бейнеролик жария етті. Ол жердегі мәтін осындай: "Біз Дональд Трамптың кім екенін білеміз. Ол 34 рет қылмыстық құқық бұзушылық жасаған, жыныстық зорлық-зомбылық үшін жауапкершілікке тартылған және қаржылық алаяқтық жасаған. Ал Джо Байден болса денсаулық сақтау шығындарының төмендеуіне, корпорацияларды өздерінің әділ үлестерін алуына көмектесті. Бұл өзін ғана ойлайтын жан мен сіздің отбасыңыз үшін күресетін президент арасындағы таңдау".

Ал Трамп Ақ үйде табылған 1 грамм кокаинның мәселесін көтереді. БАҚ өкілдері Джоның ұлы Хантер Байденнің есірткіге әуес екенін айтады. Ал кейбір телеарналарда тіпті президенттің өзі зиянды затты қабылдайды, сол себептен кейде көпшілік алдында абдырап қалады деп сынға алады. Бірақ Ақ үйдің баспасөз хатшысы Карин Жан-Пьер мұның бәрін теріске шығарып, "бұл жай ғана жаман пиғылды адамдардың жасаған видеолары, оларға сенбеңіздер", - дейді. Ал MSNBC тілшісі президентті пейілі таза адам деп ақтады. Бұл сыбыстардың бәрі республикалық партия үшін майдай жағады. Тіпті Forbes агенттігінің басшысы Стив Форбс "Forbes Breaking-та" Джоның қанша дайындалса да, қандай эликсир қолданса да, жеңіліске ұшырау мүмкіндігі жоғары екенін айтты.

Бұған дейін президенттер дебатта 2 мәрте жолыққан. Бірінші пікірталас 2020 жылдың 29 қыркүйегінде Огайо штатының Кливленд қаласында өтсе, екіншісі дәл сол жылдың 22 қазанында Теннеси штатының Нашвилл жерінде болған.

Әмір Жәнібек