Қазақстандықтар дәрігерге жазыла алмай жүр: министр мәселені шұғыл шешуді тапсырды

Қазақстанда емханалардағы дәрігерлерге, соның ішінде учаскелік дәрігерлер мен бейінді мамандарға жазылудың қолжетімділігін бақылау күшейтіледі. Бұл туралы Денсаулық сақтау министрлігінің баспаөз қызметі хабарлады.

Жүргізілген сараптама нәтижесі көрсеткендей, бекітілген қабылдау кестелерінің болуына қарамастан, пациенттердің учаскелік дәрігерлер мен тар бейінді мамандарға өздігінен жазылу мүмкіндігі шектеліп отыр.

Денсаулық сақтау министрі Ақмарал Әльназарова әрбір азаматтың артық ұйымдастырушылық кедергілерсіз дәрігерге жазылып, қажетті медициналық көмекті кедергісіз алуға шынайы мүмкіндігі болуы тиіс екенін атап өтті.

«Егер пациент емханаға келе алмаса және дәрігерге жазыла алмаса, онда медициналық көмектің қолжетімділігі туралы қалай айтуға болады? Бұл - жергілікті жерлерде қамтамасыз етілуі тиіс басты негізгі мәселелер. Халық үшін онлайн режимінде де, офлайн режимінде де қолжетімді болу қажет. Адам емханаға келіп, барлық қажетті ақпаратты алуы тиіс. Дәрігерге жазылу мүмкіндігін қамтамасыз ету - жергілікті жерлердегі денсаулық сақтау жүйесінің күнделікті міндетті жұмысы», - деді Ақмарал Әльназарова.

Анықталған кемшіліктер бойынша медициналық ұйымдарға тиісті ұсыныстар жіберілетін болады. Алдағы қазан айынан бастап аумақтық бөлімшелер мен бейінді департаменттер әр екі апта сайын алғашқы медициналық-санитарлық көмек көрсету ұйымдарында учаскелік дәрігерлер мен бейінді мамандарға жазылу мүмкіндігін тұрақты түрде тексеріп отырады.