Ресейде Юрий Дудь «террористер мен экстремистер» тізіміне енгізілді

Ресейдің Қаржы мониторингі жөніндегі федералдық қызметі журналист әрі бейнеблогер Юрий Дудьті «террористік немесе экстремистік әрекетке қатысы бар» адамдар мен ұйымдардың тізіміне енгізді. Тізім 23 қыркүйекте жаңартылған.

Ресей заңнамасына сәйкес, бұл тізімге енгізілген адамдардың банктегі қаражаты бұғатталып, оларға қаржылық қызмет көрсетуге шектеу қойылады.

Росфинмониторинг тізімінде Дудьтің аты-жөнінің тұсына арнайы белгі қойылған. Deutsche Welle мәліметінше, бұл белгі ведомствода оның терроризмге қатысы бар деген мәлімет барын білдіреді.

Юрий Дудь 2022 жылғы сәуірде Ресейде «шетел агенті» деп танылған. 2025 жылғы қарашада Мәскеу соты оны «шетел агенті» туралы заң талаптарын орындамады деген айыппен сырттай 1 жыл 10 айға бас бостандығынан айырды. Бұған дейін оған қатысты қылмыстық іс қозғалып, сырттай қамауға алу туралы шешім шығарылған.

22 қыркүйекте Мәскеудің Лефортово соты Дудьке «шетел агенті» ретінде тиісті мәліметті уәкілетті органға бермеді деген негізбен 40 мың рубль айыппұл салған еді.