Римдегі Колизей қайғылы оқиғаға байланысты бір күнге жабылды

Италияның ең көп турист қабылдайтын тарихи ескерткіші - Колизей амфитеатрында орын алған қайғылы жағдайға байланысты келушілер үшін уақытша жабылды. Оған нысанда қызмет атқарып жүрген жұмысшының қаза табуы себеп болды, деп хабарлайды Associated Press агенттігі.

Ресми мәліметтерге сәйкес, қазан айында аяқталуы тиіс жаңа жарықтандыру жүйесін монтаждау жұмыстары кезінде 22 жастағы қызметкер биіктен құлап мерт болған. Оқиғадан кейін Археологиялық парк әкімшілігі қайғылы жағдайдың мән-жайын анықтауға кірісті. Сонымен қатар оқиға орнына Италияның ең ірі Confederazione Generale Italiana del Lavoro кәсіподақ ұйымының өкілдері келіп, марқұмның еңбек келісімшартының заңдылығына қатысты ақпарат талап етті.

Италия Премьер-министрі Джорджа Мелони орын алған оқиғаға байланысты мәлімдеме жасап, тиісті органдарға оқиғаның себептерін тез арада анықтауды тапсырды.

«Азаматтың 22 жасында өмірден өтуі, әсіресе жұмыс орнында қайтыс болуы — мүлдем қабылдауға келмейтін жағдай», - деді Министрлер кеңесінің төрайымы.

23 қыркүйек күні таңертең қызметкерлер алғашқы экскурсияларды өткізгенімен, алдымен амфитеатрдың екінші ярусы жабылып, кейін туристердің бірінші тобы шыққан соң ескерткіш толықтай жабылды. Мыңдаған адам алдын ала билет сатып алғанына қарамастан, қабылданған бұл шешімге түсіністікпен қарады.

Италия Мәдениет министрлігінің деректеріне сүйенсек, 2024 жылы Колизейді 14,7 миллион адам тамашалаған. Бұл көрсеткіш бойынша ол Флоренциядағы Уффици галереясы мен Помпейдің көне үйінділерін артта қалдырып, елдегі ең көп келетін тарихи нысан ретінде тіркелді.