Каспийдегі әскери қызметшілердің қазасы екі бап бойынша тергеліп жатыр

Маңғыстау облысында әскери оқу-жаттығу кезінде 12 әскери қызметшінің қаза табуына байланысты қылмыстық іс екі бап бойынша тергеліп жатыр. Бұл туралы Үкіметтік комиссияның отырысында ішкі істер министрінің орынбасары Санжар Әділов мәлімдеді. 

Тергеу Қылмыстық кодекстің 453-бабының 2-бөлігі – «Ауыр зардаптарға әкеп соққан қызметке салғырт қарау» және 465-бабы – «Кеме жүргізу қағидаларын бұзу» бойынша жүргізіліп жатыр. 

Ведомствоаралық тергеу тобы құрылды

Оқиғаның мән-жайын анықтау үшін ведомствоаралық жедел-тергеу тобы құрылған. Қазір тергеу және жедел іздестіру шаралары жүргізіліп жатыр. Мамандар тартылып, қажетті сот сараптамалары тағайындалды. 

Премьер-министрдің орынбасары Қанат Бозымбаев оқиғаның барлық мән-жайын қысқа мерзімде толық анықтап, қайғылы жағдайға жауапты адамдарға қатысты шара қабылдауды тапсырды. 

Ауруханадағы әскери қызметшінің өміріне қауіп жоқ

Үкіметтік комиссия отырысында ауруханаға жеткізілген әскери қызметшінің жағдайы туралы да жаңа мәлімет айтылды.

Денсаулық сақтау вице-министрі Манас Рамазановтың сөзінше, әскери қызметшінің жағдайы тұрақты. Оған қажетті медициналық көмек көрсетіліп жатыр, өміріне қауіп жоқ. 

Бұған дейін оның жағдайы тұрақты ауыр деп бағаланған еді.

Қаза тапқандардың отбасыларына көмек көрсетіледі

Комиссия отырысында қаза тапқан әскери қызметшілердің отбасыларына көмек көрсету мәселесі де қаралды. Бозымбаев мемлекет оларға заңда көзделген әлеуметтік және материалдық қолдау көрсететінін айтты. 

Сонымен қатар қосымша көмек көрсетуге ниет білдірген азаматтар мен кәсіпкерлер бар. Бозымбаев Еңбек және халықты әлеуметтік қорғау министрлігі мен Маңғыстау облысының әкімдігіне отбасыларға берілетін қаражаттың ашық әрі толық жеткізілуін бақылауды тапсырды. 

Екі әскери қызметшіні іздеу жалғасып жатыр

24 қыркүйекте Каспий теңізінің жағалауындағы оқу-жаттығу кезінде ауа райы күрт бұзылып, әскери қызметшілер теңізге кеткен.

Соңғы мәлімет бойынша, 12 әскери қызметші қаза тапты, үшеуі құтқарылды. Тағы екі әскери қызметшіні іздеу жалғасып жатыр.