Екпе қайда: Қазақстандықтар неліктен тұмауға қарсы вакцина ала алмай жүр

Қазақстанда жоспарланған мерзімде тұмауға қарсы жаппай вакцинация науқаны басталған жоқ. Тұрғындардың емханаларға хабарласып, екпе ала алмай отырғаны туралы шағымдарынан кейін ҚР Денсаулық сақтау министрлігі жағдайдың мән-жайын түсіндірді.

Бұған дейін Қазақстан Республикасының Бас мемлекеттік санитариялық дәрігері Сархат Бейсенованың қаулысына сәйкес, тұмауға қарсы профилактикалық иммундау науқаны 15 қыркүйекте басталуы тиіс болатын. Бекітілген құжатқа сай, эпидемиологиялық көрсеткіштер бойынша вирус жұқтыру қаупі жоғары саналатын азаматтар топтары - созылмалы ауруы бар адамдар, мектеп оқушылары, жүкті әйелдер, қарттар, кішкентай балалар, сондай-ақ жабық үлгідегі мекемелер мен арнаулы әлеуметтік қызмет көрсету орталықтарының контингенті тегін вакцинациямен қамтылуы тиіс.

Дегенмен 15 қыркүйектен кейін медициналық ұйымдарға жүгінген азаматтар вакцинаның жоқтығы туралы жауап алған. Қазіргі уақытта бұл препарат ақылы негізде де қолжетімді емес. Айта кету керек, медициналық регламент бойынша ағзада эпидемиялық маусым басталғанша жеткілікті иммунитет қалыптасып үлгеруі үшін вакцинация вирус белсенді тарала бастағанға дейін жүргізілуі шарт.

Денсаулық сақтау министрлігінің хабарлауынша, бірыңғай дистрибьютор өңірлік денсаулық сақтау басқармаларының өтінімдері негізінде «НПО Петровакс Фарм» ЖШҚ (Ресей Федерациясы) өндірген «Гриппол плюс» сауда атауы бар вакцинаның 2,2 миллионнан астам дозасын сатып алған. Препаратты елге жеткізу кезең-кезеңімен жүзеге асырылады.

«Жеткізу мерзімдері Дәрілік заттар мен медициналық бұйымдарды сараптау ұлттық орталығында өнімді тіркеу процедураларының жүргізілуіне байланысты өнім беруші тарапынан түзетілді. Осы процедуралар аясында вакцинаның штаммдық құрамын жыл сайынғы жаңарту жұмыстары жүргізіліп, ол 2026 жылдың қыркүйек айында аяқталды», - деп хабарлады ведомствоның баспасөз қызметі.

Қазiргi уақытта өнім беруші барлық тіркеу рәсімдерін толық аяқтаған. Жеткізудің жаңаланған кестесіне сәйкес, препараттың алғашқы партиясы елге қазан айының басында жеткізіледі деп күтілуде.

Өз кезегінде Санитариялық-эпидемиологиялық бақылау комитеті бұл вакцинация жалпы жедел респираторлық вирустық инфекцияларға (ЖРВИ) емес, тек тұмаудың алдын алуға бағытталғанын атап өтті. Сала мамандарының айтуынша, ЖРВИ-ді вирустардың өте көп түрі тудыратындықтан, оларға қарсы әмбебап вакцина жоқ.

Әлеуметтік желілерде азаматтар тарапынан ЖРВИ белгілерінің ауыр өтіп жатқаны туралы шағымдар жиілегенімен, ресми статистика өзге мәліметті көрсетіп отыр. Қыркүйек айының басынан бері республика бойынша ЖРВИ-дің 51 937 жағдайы тіркелген, бұл өткен жылдың ұқсас кезеңімен салыстырғанда 1,8 есеге аз. Осы уақытқа дейін зертханалық расталған тұмау жағдайлары мен жаңа вирустардың таралуы тіркелген жоқ.